中環掃街小食優質版 貼地價鮑汁墨魚膠釀三寶＋鹹蛋黃雞粒｜出街搵食
廣告
平常口痕總愛吃點街頭小食，中環開了一間主打港式小食的立食小吃店，選擇種類豐富且食材比平常更Upgrade，如墨魚膠煎釀三寶、鹹蛋黃雞粒等，價錢亦相當貼地，以後大家午飯又有多一個選擇醫肚了！
撰文：胡蚊 攝影：Day
中環蘇豪 立食小食店
中環上班族，食個午飯，閒閒地一百蚊。近日蘇豪附近開了一間小食店，專賣充滿本土feel的港式小食：咖喱雜、鹹蛋黃雞粒、XO醬炒腸粉，價錢貼地，食物配搭明顯比遊客區連鎖小食檔upgrade，主打外賣，幾十蚊就食得飽，中 環友終於有啖好食。
即叫即炸 鮑汁墨魚膠釀三寶＋鹹蛋黃雞粒
小店其實是旁邊李好味的延伸，力sell本土fusion的李好味開業兩年多，老闆今次不設堂食，主攻薄利多銷的小食，十零廿款，再加飲品，選擇不算好多，但食物質素絕不遜於餐廳。「 我哋好多食物都係即叫即做，好似鹹蛋黃雞粒，炸好，有柯打才用鹹蛋黃推出醬汁，外香肉嫩，熱辣辣；又好似咖喱水魷，都係有人買才落鑊兜，唔會煮好一大鍋，以免放久了魷魚縮水，影響味道。」即叫即做，當然特別新鮮好味，不過代價就是平均要等8-10分鐘，但試過味道後，還是值得的。
青檸蜜糖啫喱＋陳皮話梅梳打
飲品亦見心思：簡單如鹹檸七，除了七喜和鹹檸檬，大廚特地自家製作青檸蜜糖啫喱，一啜入口，鹹檸七味道懷舊，又夠解渴，加上香甜滑溜的啫喱，口感豐富；陳皮話梅梳打，將九製陳皮及話梅先用糖水煮過，鹹中有甜，很出味，交足貨。下次約朋友去蘭桂坊 happy hour 前後，不妨順路試試！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
