上山頂! 噴煙富士山刺身 |山頂食乜好|

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Oct 14 2016

上山頂食飯，最緊要當然是靚View。想一邊聽J pop，一邊食創意西日菜，以下推介必合心意。餐廳食物創新、得意。有個100%吸睛刺身拼盤，有五款時令魚生外，最搶眼當然是以富士山造型的乾冰座伴碟，噴著煙上枱，噴煙富士山嚟喇！點爆？一於睇睇，去片！

撰文: ruby　攝影 : wyman、相關機構

靚景親民西日菜噴煙富士山刺身

上山頂食飯，為的當然是靚View。最近有家西日菜，座落山頂凌霄閣，俯瞰香港景。餐廳一室木桌椅，播着70年代日本歌唱節目，入口附近更設了日式路邊攤，大賣日本懷舊糖果和文具。食物則充滿玩味，除傳統日本刺身、大阪燒及魚生丼，還有加入多國元素的韓國泡菜餃子、蒜香沙律醬配日式照燒雞扒沙律、仿熱石燒的七味和牛等，而且定價也親民。最吸睛必是刺身拼盤，提供五款時令魚生，重點是以富士山造型的乾冰座伴碟，噴著煙上桌，如一層雲煙飄過富士山，夠創意又貼題！這裡飲品款式也多，單是日本熱賣的威士忌梳打飲品都有7款，可邊飲酒邊歎靚景。

富士山刺身拼盤 $398
有吞拿魚腩、帶子、牡丹蝦、油甘魚和三文魚，款式會因應時令改變。噴煙富士山裝飾，上桌吸睛，視覺、味覺享受。

其他創意美食拮拮泡菜餃！

食物玩味十足，有傳統刺身、大阪燒及魚生丼外，還加入多國元素。好似韓國泡菜餃子，加入大量泡菜做餡，好火辣，而且個個炸到金黃，還要一支支插在木頭上，夠型格。女士們必試日式照燒雞扒沙律，有枝豆、雞扒粒、番茄粒、蛋碎和沙律菜，配上蒜味濃郁的特調蛋黃醬，惹味非常。另一玩味之作就是仿熱石燒的七味和牛，雖然熱石只是裝飾，賣相都特別。飯後飲杯招牌富士山媽媽奶昔，蘋果乳酪加薑味雪糕打成，微辣清新，開胃。

泡菜餃子伴蒜香檸檬蛋黃醬 $68