【自助餐放蛇起底組】$148 迴轉壽司 任攞任食 送韓燒+火鍋+梅酒任飲
撰文、攝影：放蛇組
迴轉壽司 多款式!! 質素驚嚇「室溫狀態」三文魚！
迴轉壽司有十幾款壽司，有鰻魚、蟹柳、腐皮、玉子等壽司，亦有少量刺身。壽司飯其實食落有醋味，但太乾，口水分泌不夠多的要小心啃親，紫菜又濕又腍，好有前西九龍壽司一哥＂明ｘ＂的影子，玉子太乾，八爪魚咬不斷又有腥味，三文魚更是暖的！是暖的！是暖的！不太能入口！
迴轉壽司有十幾款壽司例如玉子壽司、蟹柳壽司，更有刺身、花之戀等。
還有太卷、腐皮壽司、三文魚粒壽司、粟米沙律醬壽司等。
玉子壽司比好乾的飯糰搶過風頭，分開來吃的話，玉子雖有甜味，但口感太鬆散。
蟹籽三文魚粒壽司最驚嚇，紫菜看圖已知又濕又腍，三文魚粒不是凍的，是室溫！是暖的！救命呀！
粟米沙律醬壽司和鰻魚壽司以這間餐廳的質素來說算ok，不過都是放棄嚿飯啦。
腐皮壽司正常，咬得斷，有甜味。
八爪魚壽司都好驚嚇，本身記者想先吃一件再講感想，但食第一口已經咬極唔斷！見唔見到八爪魚上面深深的牙印呢？
轉多幾轉會有些刺身和拼盤出現，三文魚雖然是凍的，但一點魚鮮味也沒有…花之戀上的沙律醬極鹹，八爪魚勁腥…好彩記者都算大命，食完之後幾日都無病無痛！
自助區選擇多 鹽焗三文魚頭任拎
食完壽司，可出去自助區再拿熟食和燒肉、火鍋料，食物都擺得頗整齊，燒肉的有牛、豬、雞肉，還有餃子、鴨胸、魷魚、蔬菜和粉麵等，幾多選擇。另外亦有些韓式醃料如泡菜和青瓜等，熱盤有日式炒麵、熱湯、麥樂雞和春卷等小食。而當日試食時到6pm左右，自助區更有鹽焗三文魚頭和秋刀魚、還有即切牛柳和葡撻等熱食。每枱送了一客兩件的麵包糠燒扇貝，雖然size迷你，但食落有牛油香，都ok。
自助區食物擺放得整齊，不過5pm入場先熱盤還是午餐先的食物，未趕得切refill，建議晚少少再吃熱盤。
約6pm自助區會有些熱食例如鹽燒三文魚頭、秋刀魚、牛柳和葡撻等任拎。
每枱送了一客麵包糠燒扇貝，食落都有陣牛油香。
燒肉肉類唔入味 大腸雞翼可encore
每張枱有一個韓燒爐和火鍋電磁爐，韓燒爐上會鋪了一張牛油紙，放食物在上面燒，牛油紙燒焦了可以叫店員幫忙更換。燒肉方邊，記者試的牛肉、牛肋肉和豚肉都不太入味，豚肉肉質很嚡！不過之後燒的大腸、雞翼則正常，鴨胸亦夠鹹香和重黑椒味，煎餃子的豬肉菜苗餡亦ok。
食物放在牛油紙上燒，可惜肉類不太入味。
雞翼、鴨胸、豬大腸、煎餃子都ok。
火鍋SET任拎 自己加湯底
火鍋在自助區，已經放好一個個滿是材料的火鍋，只需加湯便可拿回座位。湯底有豬骨湯和日式火鍋湯，記者試了豬骨湯，味道雖不太濃但亦OK。自助區內的食物其實都是適合燒肉的多，火鍋的其實不太多選擇，只有肥牛、丸類、蔬菜和粉麵類，可惜肥牛過肥，太多脂肪，啖啖滿是肥膏。
另外近門口收銀處的自助區亦不容錯過！好易走漏眼呢，有多款酒任飲，包活熱清酒、梅酒、紅酒和vodka等，還有冰凍啤酒！酒鬼最愛！
火鍋已經預備好，自己加豬骨或日式火鍋湯便可拿回座位。
火鍋料選擇不多，都是肥牛、丸類、蔬菜和粉麵類。
近門口位有多款酒任飲，有熱清酒、梅酒、紅酒和花酒等等，最啱酒鬼！
梅酒味道頗香，不過記得加冰！熱清酒亦幾易入口，配埋燒肉食，一流！
自助區凍櫃裡有好幾款甜品，除了抹茶凍質地太稀外，其他亦不錯。
總結：選擇方邊其實好豐富，有齊韓燒、日式火鍋和迴轉壽司，又有熱盤和甜品等熟食，更有好多款酒任飲，但可惜食物味道…真的沒有什麼味道可言，例如壽司簡直是有一種我行我素的風格，太驚嚇了！平日早少少5pm入座或8:45pm後入座可以$148任食2小時，這個價錢，這個質素…
一句到尾：係酒鬼你會好滿意！
韓日燒自助餐廳
地址：深水埗欽州街37號西九龍中心6樓613號舖(顯示地圖)
電話：2628 3899
$148放題供應時間：星期一至五：晚市6pm前入座或8:45pm後入座
收費：成人：$148、小童或持長者咭長者：$83
用餐時間：2小時
備註：收加一
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
