開箱試玩！ 煮食新神器 BRUNO Grill Pot 港版1鍋4用！煮、炒、蒸、炸乜都得!
撰文: Ning 攝影:Him、Fion
一鍋四用 包辦煮、炒、蒸、炸！
BRUNO Grill Pot 可以一鍋四用，包辦煮、炒、炸、蒸4種功能，比起只能煎烤，甚至要加錢另購深鍋的BRUNO Hot Plate更方便，變相亦慳了錢。容量方面，Grill Pot具備接近2L的容量，可以應付食物份量自然多，絕對不止一人火鍋。火力方面高達1,000W，溫度高，食物就更快熟。
內裡用上白色陶瓷塗層，也令食物不易黏底，比不鏽鋼容易清潔。至於外形方面，電熱盤和圓鍋可以分離，而不是將鐵盤或淺鍋放入，更可將圓鍋放上明火使用，拿入廚房煲湯都得，變相即是多個煲用。而且更有紅、白兩色，前者Sharp醒有型格，白色則帶簡約Muji風，相機食先、呃Like一流。
測試一：煮！圓鍋傳熱快 豐盛日式牛肉鍋
先來試試 BRUNO Grill Pot 的煮湯功能，因為Grill Pot的鍋身較高，可容納的食材就更多，湯汁亦無咁易滾瀉。測試當日就弄了個4人份量的鍋物，放到大量蔬菜和配料，而且傳熱度高，食材如牛肉可以快速燙熟；起初加熱雖然唔似不鏽鋼咁快，但10分鐘內已經達到滾燙，而且保溫良好，湯汁keep住滾熱，用來打邊爐或燜肉都無問題。
測試二：炸！均勻不彈油 炸蝦+天婦羅
以往B仔的陶瓷深鍋鍋身太淺，製作炸物會有一定的危險性，今次圓鍋只須換上隨機附送的波浪形炸鍋蓋，於鍋內倒入炸油加熱就能做各式的唐揚炸物。
最多可加約1,000mL的炸油，更貼心設有最高油量指示線。試玩炸蝦和天婦羅，也是一次成功，鍋的深度也減低了彈油機會，炸晒全份天婦羅都無油濺出；加上因為以電爐加熱，散發的油煙不算太多，在室內用都唔怕滿屋臭味；油溫也keep得住，做出來的炸物色澤和熟度也頗平均，用來炸Party Food就最適合。
測試三：蒸！鍋蓋夠貼不走水 燉蛋+茶碗蒸
BRUNO Grill Pot 也跟機附上圓形蒸架，可以用來蒸煮食物。和坊間的小電鍋不同，B仔的蒸煮水量可達700mL，而且夠高，唔只淨係可以蒸點心，記者用燉蛋和茶碗蒸來做測試，最多可以容納兩個2吋高的燉杯，也可以用小型燉盅來做湯品或糖水。鍋蓋夠緊貼鍋邊，蒸煮過程走水量不多，也沒有蒸乾水，變相即是可以慳水減水量。
測試四：煎烘！烘爆谷+豚肉生薑燒
BRUNO Grill Pot 亦可以用來炒菜、煎煮，今次用來烘爆谷，小朋友見到就最開心。因為用上底部的圓型電盤發熱，整個鍋底都受到熱，比姊妹Hot Plate只得中間有發熱線平均得多，故此幾乎每個位置的粟米粒都能爆開米花。唯一缺點就是鍋蓋不透明，睇唔到當製作爆谷的進度，打開觀察的話，會有部分爆谷飛出。
另外再炒豚肉生薑燒，火侯不錯，肉類和洋葱快速入味，而且炒完剩下的醬汁油漬不多，亦無燶底，免除了用不鏽鋼鍋易燶及清潔困難的問題，Grill Pot煮食後只須輕輕用水浸，再用海棉洗刷即可，算易清潔。
邊到有得買？最快6月底到貨！
講咁耐，來到大家最關心的問題。一，有咩色：和日本一樣，港版 BRUNO Grill Pot 都有紅、白兩色可選，啱晒不同風格的女生。
二，幾時有得買：和去年一樣，先預訂後取貨，現貨有剩才會作公開發售。Grill Pot將由六月開始接受預訂，須親身前往銷售點預訂，並且支付全部或一半訂金，最快月底到貨。
另外，今次同樣會有官方港版食譜，暫定6月底或7月初推出。各位B粉，記得Mark實日子，準備入貨吧！
BRUNO Grill Pot 多功能燜煮鍋
售價：$998（連蒸架、炸鍋蓋）
銷售點：Sogo、city’super、全線百老匯、Aeon、二德惠烘焙店、橘子烘焙
訂購方法：親身前往銷售點預訂，須支付全部或一半訂金（視乎銷售點而定）
預計到貨日期：6月下旬
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
