新春美食盡在利園區小街巷！傳統港粵菜＋東南亞風味＋主題Café

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Jan 15 2020

（Presented by Lee Gardens Association）

新春臨近係時候出動周圍拜年啦！想順便跟同事或親友飯聚做節，推介嚟到交通方便嘅銅鑼灣利園區小街巷（ http://www.leegardens.hk/zh/ ），尤其係白沙道同蘭芳道，雖然只係兩條短短嘅內街，但勝在位處市中心且旺中帶靜，更隱藏咗唔少高質又富特色嘅餐廳café，等你嚟發掘同品味。

Leica概念店café＠Café Leitz

由德國相機品牌Leica聯乘本地咖啡團隊INTERVAL Coffee Bar合作開設，大隱隱喺Leica香港旗艦店內，係攝影迷同咖啡迷必到嘅朝聖地！Café Leitz主打精品手沖咖啡同特色創意飲品，亦會定期轉換Menu，而店內所有咖啡豆均選用味道鮮明、層次豐富嘅丹麥Coffee Collective出品！由於café與相機店同藝廊相連，方便大家邊嘆住咖啡，邊欣賞店內新品、珍藏及主題展覽（殿堂級Steve McCurry作品正展覽中！），連串成滿載攝影藝術同生活品味嘅獨特體驗。本地著名設計團隊為Café披上神秘嘅黑色豎紋金層外牆，象徵Leica相機鏡頭變焦環刻度嘅細節，再襯以向50至60年代香港致敬嘅灰白格仔地磚，玩味得嚟又有型格個性。

（左上）冷泡咖啡$55，是咖啡迷Grab ＆ Go首選。（左中）Espresso Lime Tonic＄55，以咸檸檬、鮮青檬、濃縮咖啡同湯力水混調，層次豐盈。（中）加入伯爵茶調製嘅 Arnold Palmer $40，清新醒神。（中下）順滑香濃又有靚拉花嘅Latte $46。（右上）可以選豆嘅手沖咖啡 $70。（右下）每日新鮮焗製嘅曲奇餅，並有花生、燕麥、提子乾、雙重朱古力4款口味。（中上）歡迎買包咖啡豆返屋企慢慢嘆。

Café Leitz

地址：銅鑼灣白沙道12號地舖

營業時間：星期一至日，8:30am–6pm

註：收現金、Visa、Master、Apple Pay、八達通、銀聯

文青茶道美學：BASAO

以當代茶道透現生活美學，為茶葉發掘更多可能性。品牌的茶事工匠團隊會走訪各地茶園，並與茶農生活，再嚴選出優質靚茶葉於店舖供應，當中包括多款中國福建岩茶、台灣阿里山烏龍茶、日本和束煎茶、印度大吉嶺及尼泊爾手揉紅茶等。同時邀請土壤專家教授茶農環保種植法，以推動可持續發展；更於廈門自設工場烘焙炒茶確保品質。每杯茶飲均由茶藝師即席沖泡，由茶杯、手勢、水溫同酸鹼度都有講究，強調要用硬度50以上同PH值大於7嘅水嚟沖茶先至完美！店內現時提供單品手沖茶、發酵茶、CHAJITO特調茶飲、茶拿鐵，仲有同靈感源自Draught beer嘅氮氣冷泡茶，以及即點即烘嘅酸種麵包吐司、精緻蛋糕、輕食等葷素選擇。

（前）是拉差辣醬雞肉酸種麵飽吐司$78，泰式醬汁惹味開胃加埋雞肉同多士，成為好味又高蛋白低熱量嘅輕食首選。（後）單品手沖茶飲＄48 – ＄215，備有多款茶葉選擇，包括皇牌武夷山大紅袍，茶迷必試！

品牌三重鑑定茶杯由設計師負責，較傳統蓋碗更顯簡約摩登，而茶藝師會喺客人落單後即席沖泡茶葉，成為吧檯前一道迷人流動風景。

銅灣灣店面空間感十足，尤其吧檯位置更出現多重空間穿越視效，而望街窗邊位則有法式露天café感覺，唔同角落亦有個別特色設計座位。

BASAO

地址：銅鑼灣白沙道16號地舖

電話：2338 8172

營業時間：星期一至日，8am–9pm

註：收現金、Visa、Master、Apple Pay、八達通、銀聯

國宴級台灣美食：犇之食堂

想食正宗高質又價錢相宜嘅台灣菜？咁就要嚟犇之食堂（犇：音奔）啦！連店名都講明用上3倍牛力為大家炮製地道台菜，故自開張以來每日都吸引好多人大排長龍！主廚同部分員工都係台灣人，並且堅持大部分食材同調味醬料選用家鄉出品或自家製作，或轉用更美味有營嘅食品，例如滷肉飯會嚴選每頭豬只有兩塊嘅豬肩頸肉，先切條再煮融化起膠，並配搭日本新瀉米。另又選用澳洲有機認證新鮮農場雞蛋，確保食材符合無添加、無激素、無味精嘅健康飲食原則。不過為配合香港人不太嗜甜嘅口味，亦酌量將菜式甜度略減15%。

（左上及右下）古祖味鹽酥雞滷肉飯＄82，每日限量供應，肉脂比例為七比三，滷肉入口香而不膩，米飯則沾滿滷肉餘香！（左中）丫爸皮蛋豆腐＄42，先將溏心皮蛋與嫩豆腐搞碎成碗狀，再鋪上木魚、肉鬆和秘製蒜醬油，味道齒頰留香。（左下）話梅小蕃茄＄38，將台灣話梅煮成汁，再加入冷凍去皮小蕃茄泡浸至入味，酸甜適中非常開胃，是鎮店小食之一！（中）眷村紅燒牛肉麵＄88，選用美國上盈牛展烹調70分鐘至軟腍入味，加上自家製麵條沾滿每日新鮮熬足8-10小時嘅牛骨海鮮金華火腿湯底，味道零舍鮮香濃郁！（右上）水果烏龍茶＄38及黑糖珍珠奶茶＄46，均選用台灣高山烏龍和茉莉冷泡而成，別具清香餘韻。

未到午餐時段店外早現長龍，午餐時段更是座無虛席，深得同區上班族及鄰區街坊食客歡迎。

犇之食堂

地址：銅鑼灣白沙道11號地舖

電話：2468 4668

營業時間：星期一至日，11:30am–10pm

註：收現金、Visa、Master、Apple Pay、八達通、銀聯

懷舊港式西餐館：太平館

創於1860年嘅太平館係港粵地區首間港式西餐館，亦係Fusion菜嘅始祖，唔少歷史偉人都曾經係座上客！其首創以中式調味醬料融入西式烹調手法嘅「豉油西餐」，更加係陪伴香港幾代人成長兼最具代表性嘅味覺回憶之一！瑞士雞翼嘅故事流傳至今依然為人津津樂道，而一系列冠以「太平館」排頭嘅招牌名菜，好似干炒牛河、瑞士汁炒牛河、燒乳鴿同焗梳乎厘，幾乎係每枱必點美食！當然唔少得焗蟹蓋、燒豬髀、烚鹹牛脷等經典名菜啦！想食刁鑽懷舊菜，推介岑味牛脷、花旗砵酒豬扒、摩囉雞飯、雀肉大蝦多士，都係現時坊間近乎絕跡嘅古祖佳餚，由味道到故事均引人入勝！

（左上）乾炒牛河 $129，以鮮爽滑彈嘅牛冧肉，混合三種老抽、生抽，再加入新鮮河粉炒製而成，鹹中有甜、層次分明。（左中）瑞士汁雞翼$185，一碟足有8件大大隻雞全翼，並即點即浸喺由頭抽、冰糖、紹酒、上湯同香料混調而成嘅醬汁內，再以文火慢慢浸熟，絕對係古法Slow Cook嘅代表，唔怪得雞翼咁入味同滑嫩多汁啦！（右中）梳乎厘 $148，絕對係全港最有代表性嘅港式甜品之一，超巨型size空氣感十足，外鬆內軟微甜，既可一人獨享又可多人分享，更加係打卡必點嘅開心美食！（右下）葡國雞飯 $ 149，雞肉多汁香滑且充滿椰汁、黃薑等香氣，伴以焗飯更見滋味。

餐館內所有陳設裝潢，仍保留住上世紀60-70年代高級西餐館嘅格調，既坐得舒適又予人強烈嘅電影感，故深受唔同年齡層食客同遊客歡迎。

太平館餐廳

地址：銅鑼灣白沙道6號地舖

電話：2576 9161

營業時間：星期一至日，11am-11:30pm。

註：收現金、Visa、Master、銀聯。

傳統四川菜：南北樓

想以大嗚大放、「紅」運滿溢嘅正宗四川菜作開年飯攞個好意頭，首選有50年歷史嘅川菜老字號南北樓！回溯上世紀60年代，創辦人李先生聯同兩位兒子創辦南北樓，藉一菜一格、百菜百味嘅巴蜀廚藝精髓以饗老饕！多年嚟堅持由四川直送所有川椒香料，並用心炮製酸椒糊麻香等辣味；以及怪味、魚香等24種巴蜀風味佳餚，更因此屢獲獎項，深受國際媒體推介！加上猶如時光倒流嘅仿宮延彩雕天花同巨型燈籠等裝潢設計，為現場增添一份古雅貴氣，故吸引好多本地同外國食客幫襯！廚師推介有酸辣湯、鐡板干燒蝦球、宮保雞丁、樟茶烤鴨、松鼠石斑等，可謂豐儉由人。

（左上）重慶雞丁＄330，雞丁入口嫩滑，味道麻辣中見鋪排餘韻。（左中）鐡板干燒蝦球＄510（中），麻辣香隨熱氣繞縈全場，蝦球更是新鮮爽彈。（右中）烤正宗北京填鴨＄580 (全隻)，烤鴨非常飽滿，加上皮脆肉嫩又多汁，令人食指在動！（右下）雲片白肉＄210（中），五花腩肉絲薄透光，足見廚師功架！伴以蒜泥同吃，味道豐盈誘人。

南北樓

地址：銅鑼灣蘭芳道7號地下

電話：2577 3811

營業時間：星期一至日，11:30am–10:30pm

註：收現金、Visa、Master、AE、銀聯

泰菜迷必食：曼谷食堂

新春期間覺得食得太多中餐，不妨偶爾換吓口味轉食泰菜！曼谷食堂所有廚師均為地道泰國人，為咗盡量呈現百分百泰式滋味，大部分食材、調味，以至茶葉、飲品等均由泰國進口，並強調「泰國味道，香港口味」！不過泰式無骨海南雞、泰式滷水豬手、泰式滷水鴨等招牌菜，為確保新鮮同最佳質素，就會交由工場每早製作後送到食堂。其他菜式如泰式船麵、炸香茅單骨雞翼、飛天通菜，仲有冬蔭公系列同泰式咖喱系列，都做得好出色！由於餐廳靈感源自泰國商場Food Court，因此店內設計走簡約明快路線，價格亦相宜抵食，無論午餐、晚飯定下午茶都係個好選擇。

（左上）冬蔭公汁燒雞扒飯＄65，燒雞出奇嫩滑，配以冬蔭公汁，酸甜微辣又開胃。（左下）曼谷遊船河＄70，以鮮甜濃郁嘅鴨湯底炮製，仲可以自選多種配料。（右）雙拼飯：無骨海南雞拼泰式滷水豬手＄72，特別為心多多人士而設，海南雞香滑多汁，豬手先炸後滷，兩者均已走骨。（右上）傳統曼谷奶茶＄22，精選泰國茶葉沖製，色澤尤其棕紅。另有泰國出名嘅Singha Soda，可單飲或調製成青檸梳打，味道更加正宗！

曼谷食堂

地址：銅鑼灣蘭芳道23號地舖

電話：2363 9303

營業時間：星期一至日，11:30am–9:30pm

註：收現金、Visa、Master

新派越南菜：Pho Metro

Pho Metro喺加拿大已有5間分店，由於老板早年由多倫多回流，卻有感搵唔返以前加國讀書時食開嘅Pho（越南湯河）滋味，於是誠邀被喻為「Best Pho in Markham」同「多倫多最佳越南湯河」嘅Pho Metro越南主廚「媽媽」來港開設分店，所以店內經常會見到有好多CBC幫襯。牛湯係越南湯河嘅靈魂，因此主廚每日都會精選美國安格斯肥牛，再加上50至60斤本地新鮮牛膝同牛筒骨連骨髓，用文火慢熬8小時，令到牛湯味清甜又有濃香牛骨味！現時店內所有菜式由老板之一兼主廚Andrew主理，味道跟加國原味有8成相似。除咗越南湯河系列外，蟹膏湯檬、炭燒豬頸肉等越式湯檬同小食都值得推介！