Pokémon聖誕亂入黃埔！必影7.5米高比卡超＋伊貝見面會！@Miss Sunny

GOTCHA！出嚟啦！比卡超！最近比卡超真人大電影就發布咗最新宣傳片，令身為比卡超粉嘅我超級掛住一班小精靈！有粉絲團就share喺黃埔野生捕獲到比卡超，仲要係7.5米高！原來今年聖誕比卡超帶埋伊貝同一班小精靈去到黃埔天地一齊玩，除咗有7.5米高充氣比卡超、劇場版電影火車，有香港首次嘅見面會，即睇以下介紹，睇定有咩玩啦！

20倍大！7.5米高充氣比卡超登陸「黃埔號」！

喺「黃埔號」前面近距離望隻比卡超係超震撼，卡通中嘅佢只有0.4米，而家足足高咗這20倍咁多！唔知個精靈球要幾大先裝得落佢！旁邊仲有閃爆精靈球聖誕燈飾，圍住兩隻迷你充氣比卡超閃下閃下，夠晒電力呀！

香港首次！伊貝粉絲抱抱見面會！

喺Pokémon 受歡迎嘅點止比卡超一個，當然仲有超人氣嘅伊貝啦！12月2、8、22至26日將有《比卡超及伊貝抱抱會》，除佢哋會孖住出巡同大家近距離接觸，快啲mark低，準備好相機一齊selfie啦！

完美重現！聖誕大電影 風車市鎮場景

黃埔天地時尚坊中庭就率先呈獻聖誕大電影中「風來城」嘅風車市鎮裝置，一排排歐陸式風車下，遍布住小精靈嘅大型毛茸茸公仔包括伊貝、卡比獸、吉利蛋等等。2米高嘅聖誕樹亦掛滿比卡超，等大家一齊去收服！

出發「風來城」！Pokémon

要去「風來城」當然要乘搭Pokémon聖誕火車啦！除咗有火車車廂場景，仲有比卡超陪你乘搭，欣賞「沿途」見到嘅風景同小精靈靚相。

隱藏版比卡超聖誕燈飾+聖誕大匯演

喺卡通裡面，比卡超係最唔鍾意被小智收入精靈球㗎！所以今次佢為咗唔畀人收服都偷偷地匿喺唔同嘅地方，等大家努力啲「集郵」。當然若果未夠喉，聖誕期間就可以一次過見晒3隻比卡超同3隻伊貝組成嘅萌爆舞團，同你䟴住過聖誕！

超巨型7.5米充氣比卡超及其他Pokémon聖誕裝飾
日期：即日至2019年1月1日
地點：黃埔天地 （港鐵黃埔站C出口)
時間：上午10時至晚上10時

風車市鎮兩米高Pokémon聖誕樹
日期：12月1日至2019年1月1日
地點：黃埔天地時尚坊MTR層
時間：上午10時至晚上10時

比卡超及伊貝抱抱會
地點：黃埔天地時尚坊MTR層
日期：12月2、8、22日
時間：下午2時30分及5時30分（每節30分鐘）
日期：12月23至26日
時間：下午4時

Pokémon聖誕大匯演
日期：12月23至26日
地點：黃埔天地時尚坊MTR層

時間：下午2時30分及5時30分