【Book Cafe的浪漫】扮文青~睇書歎紅豆冰‧好好好寫意!＠大仁生活
從前由屋企到西營盤最少要呆坐一小時巴士, 今時今日地鐵站一出便到,需時只不過20分鐘左右.
紅磚牆綠窗花的Books & Co, 正正就在聖士提反女子中學斜對面, 巴士站旁邊的二手BookCafe. (外貌已經夠晒吸引, 忽然整個人呼吸都文化D)
推門入內, 十足十前年套日劇「古書堂事件手帖」格局. 阿太問:「乜你睇書嘅咩?」, 我答:「佢哋啲嘢食好好味」(不過暑假嚟啲SET仲係 $45, E家變咗$50蚊)
老闆James及太太Joanna一般周末就會到書店幫手, 八卦的我問老闆:「點解你哋嘅紅豆冰感覺唔同啲嘅?」, James:「店長研究用冰糖, 紅豆冰都係自己磨, 好多人都話好飲」(真係好飲, 唔係假)
沙律蛋多士一樣好食, 好味到一份絶對不夠喉…
不過如果可以…早知我的漢堡扒意粉還是不要茄汁比較好. (真係一食就知自家造, 和交來現成貨的分別)
店長:「以前我哋啲蛋糕真係現成攞貨,E間芝士蛋糕係我哋自家製, 一定新鮮過之前, 成本都平咗」(手勢仲好好添…E度嘅食輕好食過正餐多多聲)
阿太好高興:「你睇下? 當年你追我嗰時睇嗰本『長假』, (乜當年唔係睇VCD咩?), 睇書呀! 我話無DVD機…你唔記得咩?」ER……
(真係唔記得…轉移話題為妙…E…阿囝你睇本IQ博士好唔好睇呀?) 阿囝:「佢同電視一樣, 只有兩個故事唔同」(吓?你咁快睇得晒??SCANNER眼呀?)
原來, 當年James也是Books & Co的熟客, 因為8年前得知前老闆想頂手, 愛書如命的他, 不忍如此好地方就此消失, 於是膽粗粗就接手.
James:「做落又覺得以前做客好好多, 有人招呼我, 又無壓力; E家變咗又要兼顧雜務, 責任重咗, 當然我又唔會放棄, 因為時不時都遇到開心事」
(有咩開心事?) 老闆娘Joanna:「曾經有一對小情侶, 一個讀英皇, 一個讀聖士提, 佢走嚟同我哋講, 話當初係E度認識, 之後問我哋借場影結婚相,真係好替他們感動」
古色古香的Books & Co開業已經15年, 如此浪漫的地方, 應該造就不少書店情緣, (咁你哋係米都係E度認識架?)
James搖搖頭, 偷望了太太一眼:「咁我哋又唔係喎」(如果係,這個故事就肯肯定更加刻骨銘心喇)
書店的盡頭的一個如同電影場景的木樓梯, 全店堆積如山的古書, 懷舊的木書架, 充滿故事性的窗台….本來好有味道, 好有詩意, 誰知…
阿太又從袋中拿出她的新寵:「你幫我影杯緣子, 我唔知點影靚呀…」(吓? 畀James見到, 可能會趕我走喎…咁低能, 不如埋單出去外面影啦)
地點：香港島半山區柏道10號地下
營業時間：星期一至日 11:00 – 19:00
電話：2559 5199
大仁生活facebook
