$200筍價 澳門做「藝．文青」@Travel佳
家陣去澳門除咗食好西，仲可以做個結結實實嘅「藝．文青」！第27屆澳門藝術家節4月底開鑼，以約$200嘅價錢就可以欣賞到國際水準嘅戲劇、舞蹈等藝術表演，價錢平過香港，認真抵！我Travel佳已經買咗飛，準備學做文藝青年，首推多齣莎士比亞劇目，不論係初級定高級文青，睇完用嚟拋書包得，用嚟滋潤身心亦得，得咗！
4大莎翁劇場
1. 夏日浪漫《仲夏夜之夢》
識睇一定會睇莎翁經典浪漫愛情喜劇《仲夏夜之夢》！今次由美國百老匯導演伊凡‧麥斯威尼擔旗，炮製呢齣開幕鉅獻！ 用上獨特手法，華麗精緻嘅舞台布置，令呢齣經典作品更易入口，包你一定睇得明！
2. 互動劇場《微觀莎士比亞》
想試吓另類劇場體驗，呢個透過箱子，由觀眾帶上耳機、聽隨拍令行事，成為箱子劇場演員嘅《微觀莎士比亞》互動劇場就最啱你！5個箱子劇場，每個歷時8分鐘，一個價錢親身落場感受幽默、愛情、復仇嘅愛恨交纏，更喺戶外嘅區華利前地舉行，咁過癮嘅體驗，你唔係唔試呀嘛？
3. 爆笑抵死《短打莎士比亞》
一個晚上，3位演員以唱、做、唸、打、雜技、魔術等方式演繹莎翁的經典鉅著！由《哈姆雷特》、《羅蜜歐茱麗葉》到《李察三世》等37部名著。今次更加係全球首個中文《短打莎士比亞》，加入貼地語言，夠晒本土，即使係話劇初哥都可以笑到碌地！
4. 莎翁無國界《馬克白》
為莎翁最短嘅悲劇作品，今次將原來嘅故事移至剛果東部，以血礦、種族衝突、冷血軍隊貫穿整個故事。請來10位南非歌劇演唱家演繹故事，仲有巴爾幹半島嘅「無疆界管弦樂園」現場奏樂，帶來前所未有嘅視覺、聽覺衝擊，睇完包你升lev做高級文青！
唔想獨孤一味睇莎翁？其實第二十七屆澳門藝術節仲有好多好精彩嘢！適逢今年東西方戲劇大師湯顯祖及莎士比亞逝世四百周年，藝術節亦獻上湯顯祖多部名著，包括《紫釵記》及《牡丹亭》。另外，亦有啱一家大細嘅親子劇場、備受讚賞嘅花式舞蹈溜冰表演，以及世界知名戲劇及歌劇導演羅伯特．威爾遜再踏台板， 熱愛戲劇嘅藝．文青唔睇就執輸喇！
其他劇場推介
【大師經典】
-《紫釵記》朱振華與本地粵劇精英
第二十七屆澳門藝術節
日期：2016年4月30日至5月29日
網站：www.icm.gov.mo/fam
購票：www.macauticket.com
有到日本旅遊前要了解的實用資料嗎？
日本是香港人最愛的兩大旅遊地點，去旅行前必看5大旅遊保險保障新冠肺炎的比較，另外為你推介日本10大好用電話卡，亦可參考日本8大Wifi蛋推介。當然亦要事先了解日本地區天氣、電壓、電源插頭、入境簽證要求及大使館電話。
