龍蝦三食、同場加映變色梳打 @ Poortravellers窮遊

一上到樓就見到白色瓷磚裝修，有啲台灣嘅風格。喺門口等緊嘅時候，已經有店員主動走出嚟招呼。

一嚟到就梗係要叫個龍蝦匯（$398）先，每日限量供應，好彩嗌嘅時候都未賣晒！龍蝦三食，包括龍蝦包、半隻烤蒜蓉牛油龍蝦、龍蝦海鮮什錦烏冬或飯。

首先會上咗龍蝦包同半隻龍蝦先，伴碟仲有雙色薯條同埋沙律。

伴碟嘅雙色薯條比想像中出色得多，用咗普通薯仔同黃心番薯做嘅。薯條屬於幼身，但係炸得非常脆口，炸油都算新鮮，唔係用千年油炸。

枱面有檸檬同芝士汁，店員話芝士汁係淋喺個包上面；檸檬就用喺半邊龍蝦。用碟上面嘅半舊檸檬滴啲汁落去半邊龍蝦度，用叉輕易起肉，見到龍蝦肉超級大隻而且實淨，用牛油烤過嘅龍蝦配埋檸檬汁清新開胃，算係唔錯。

半邊龍蝦之外，仲有一隻龍蝦鉗，預先開好左，只需要用嘴吸一吸，就可以吸晒啲龍蝦肉出嚟。龍蝦鉗好大隻，食落啖啖肉，比龍蝦身更加嫩滑。

本身以為龍蝦包係用漢堡包，但呢度用咗類似排包嚟做，配搭新穎。麵包事先焗過，充滿牛油香，面頭脆脆地。包入面龍蝦肉份量一啲都唔孤寒，配埋幾條菜，淋埋芝士汁更係一流，係三食之中最好嘅一樣。

食到七七八八，店員就會自動自覺上埋石鍋烏冬。湯底係龍蝦湯，有啲似平時西餐飲嘅龍蝦湯，但係再淡少少。留意番，成個烏冬入面其實係冇龍蝦肉，有嘅只係好多細細粒嘅蝦肉、兩條扮龍蝦嘅蟹柳。

烏冬一上枱時還好，但用石鍋嘅關係，食嘅時候已經太稔。

食到口渴，梗係嗌返杯嘢飲先。Master Magic（$38/杯；$88/榨），就係要睇下佢有幾magical。本來係藍色嘅梳打水，加咗中間嘅檸檬汁之後竟然變咗⋯⋯

係紫粉紅色，超級靚。攪勻之後就會係粉紫色，完全係視覺享受。

Master Kama

電話：3421 2129
地址：銅鑼灣謝斐道500號維安商業大廈3樓（顯示地圖）
營業時間：星期日至四: 12:00-22:00；星期五至六及公眾假期: 12:00-23:00
延伸閱讀：
$99買一送一 韓式芝士年糕火鍋放題 @ Poortravellers窮遊
葵廣新店大過手掌～蜜糖芥末手卷@ Poortravellers窮遊