【香港美食】 尖沙咀 韓國餐廳 – SURA 水刺韓饍．失而復得的美味！
我去左喇，大家唔使搵喇！因為已經做完喇！！Sooooosad~~~~~~
個豆漿冷麵係6月、7月限定！即是話，佢播得出街都已經無左！！(ﾟДﾟ≡ﾟДﾟ)
聽到隔離枱食客在Menu上搵唔到豆漿麵之際，我同佢地講已經無左喇～
大家都大為失望… 食客甚至有點怒火：
點解要限定只做6月、7月呢？6、7月豆漿先當造咩？！真係俾小儀玩死…(￣▽￣)”
唉～卡卡和Mr.Brown都抱住失望既心情繼續睇Menu..
一場黎到，一於試下呢間 韓國餐廳 掂唔掂啦～！竟然俾到驚喜我地喎～！(･ ω ･)
「 水刺韓饍」位於尖沙咀山林道上樓餐廳，佐敦鐵路站D出口步行4mins，易去易搵！
老闆係韓國人oppa！我地lunch time 到達，不用等位，
而且坐位非常寬闊，坐得非常舒適，第一點值得讚賞！(￣ー￣)b
因為無左豆漿麵，我地兩人點了一份午餐套餐 – 烤牛肋骨配水冷麵 (或可配泡菜湯+白飯) HK$138，
加一碗辣海鮮湯麵 HK$88 (怕辣既金剛話唔辣又好好味) 和 一份芝士海鮮煎餅 HK$148。
香港有啲 韓國餐廳 ，份前菜真係好似扮下野咁，係咁咦俾碟泡菜仔你 (試過又細碟又難食)
水刺韓饍既前菜一啲都唔hea喎～～有5款：泡菜、黑豆、芽菜、菠菜、醃蘿蔔，每款都好味～！
在前菜上看得見餐廳既用心，讚～！第二點值得加分！(￣ー￣)b
第一款上桌的是金剛推介的辣海鮮湯麵！
先試一試個湯，可能想配合返香港人口味，少少辣，係幾好味！
麵已經唔係金剛小儀介紹既泡麵，麵質有點像中式陽春麵，配上湯底都幾搭！
不過，海鮮湯麵既海鮮竟然係敗筆…
除了魷魚ok之外，青口、蜆等海鮮都唔多鮮、甚至無咩味，所以呢款我就無下次喇～！
然後，我地既午餐套餐到喇，烤牛肋骨配水冷麵！
水冷麵跟韓國的餐廳一樣，自己落白醋和芥末醬，調配自己喜歡既口味！
而韓國的水冷麵麵質有分兩種，一種是軟身、一種是爽口彈牙，
水刺 韓饍的水冷麵是用後者的麵質，喜歡彈牙蕎麥麵既朋友記得去食喇～夏天食佢好爽啊～！≧ω≦
另一邊烤牛肋骨在小鐵盤上發出吱吱聲，熱辣辣～ 確係香氣撲鼻～ 好好味！！！
我食唔停口！牛肋肉質嫩，配上香烤的醬汁，呢個真係好正～！
第三點值得讚賞！推薦！！(≧▽≦)b
最後就是芝士海鮮煎餅！即使在韓國也好少食到海鮮煎餅係配芝士！
香港都好少有，聽落覺得好吸引!!! 所以點了它，果然不負卡卡所望！！(￣▽￣)~♥
上桌時俾佢嚇襯，因為成個pizza咁款，好大份！比起一般的海鮮煎餅大和厚身！
看著上面滿滿的芝士，已經急不及待要開動了！用上 Mozzarella Cheese，拉絲效果滿分！
食落一點也不像一般吃到的韓式煎餅，勁似加左芝士既潮洲海鮮蠔餅！
邊位酥脆～好好味呀～！第四點值得讚賞喇！推薦啊！！！(≧▽≦)b
雖然特意前來沒有了韓式冷豆漿麵(￣∇￣”
好在食物質素都唔錯～ 尋回失而復得的美味！！〒▽〒
佢仲有好多韓食，例如：韓燒、韓式拌飯、醬油蟹等
如果你知道佢聽取民意做返個豆漿麵，請做好心 話聲我知～～
_____________________________________________________________________________
水剌韓饍 SURA Korean Cuisine
電話：2711 7700 (可以訂座)
地址：尖沙咀山林道17-19號山林中心2樓
營業時間：星期一至日 1200-1500、1800-2300
Facebook：facebook.com/SuraKoreanCuisineIShuiCiHanShan
Google Map :goo.gl/maps/fVq1O
_____________________________________________________________________________
更多分享吃喝玩樂、機票優惠、酒店優惠、旅遊資訊 ▼▼▼
更新update 盡在『 F A C E B O O K 』
覺個好請來給我讚好 ~( ≧ ω ≦ )/~♥
小師奶卡卡奇遇旅圖 CACAmazing Travel
