飲茶 唔老土 朗豪坊歎Cute爆點心創意小菜@Dining娜
老老實實，我平時唔多 飲茶 ，怕酒樓又嘈又迫，而且點心來來去去嗰幾款，見到都悶。不過凡事有例外，早幾日陪阿媽去開朗豪坊shopping，畀我喺food court嗰層發現Yum Cha開了新店。咪勁多人喺IG貼相有唔少Cute爆點心嗰間囉！店員話有啲點心、小菜係得朗豪坊新店有得食。梗係唔執輸，要試吓。
中西合璧 巨型graffiti陪你 飲茶
入到去，果然幾潮，open area設計，一大列灰色的絲絨梳化位，唔講仲以為自己去咗西餐廳。牆上幾塊大鏡又畫咗graffiti，可愛得嚟又幾有型。突然，傳來阿媽嘅聲音：「女，乜有點心叫『紅都面埋』？『睇住流奶』又係乜？」「哈哈，呢間店出咗名做自創點心，外面食唔到的，你一陣試吓就知喇！」埋位就點了阿媽睇唔明嘅「紅都面埋」同「睇住流奶」，仲有幾款朗豪店獨賣嘅小菜。
Cute爆點心 有姿勢味道好實際
蒸籠上枱，一打開，媽媽笑了。「咁盞鬼嘅！」「紅都面埋」原來係用紅菜頭汁染成粉紅色的中式包，上面有對小眼睛同鮮紅蝴蝶結。吃一啖，原來是麻辣豬肉包，唔算辣，幾惹味。至於「睇住流奶」，就係店中招牌熱賣點心，一搣開就見金黃色的奶黃餡漏出來，極多奶黃，果然包如其名。再來的「狗不理腸」竟然係狗仔造型的臘腸卷，真係估你唔到！至於「有色蝦餃」都好吸睛，餃皮上透出紅紅綠綠橙橙的顏色，餃邊仲有金箔，大大隻，蝦非常彈牙，真正皮薄餡靚。難怪連阿媽都忍唔住用手機狂影，話要開心share畀朋友。
一定要食「朗豪坊新店限定」
以為驚喜到此為止，原來小菜都很精彩。侍應捧來木槌、剪刀、夾子，當住我們面前將雞扑開。再細心剝掉鹽殼、牛油紙和鮮荷葉，即時傳來好香的松露氣味。原來春雞內釀滿炒香的菇菌，淋點黑松露汁同吃，雞很嫩，菌很爽，松露很香。接着上枱的「麻婆水牛」亦好有趣，用西式水牛芝士配經典麻辣肉醬，論質地，水牛芝士比豆腐硬些少，但同麻辣味道一樣咁襯，食到少少奶香，好有趣。還有用砵仔上的「成砵辣牛」，用了安格斯牛小排，鋪上好多辣椒，以為一定好辣，但吃起來麻多辣少，每件牛小排都好軟滑，好香好惹味。
這一餐吃得很滿足，臨走前經過櫃枱，見到有個「睇住流奶」的鎖匙扣，黃色有對眼睛，好可愛，賣$20，扣除成本後撥捐奧比斯，咁有意義，梗要支持吓！
