酒店離譜眾生相！千奇百趣！@杜遊珍
廣告
上期揭發完酒店執房內幕，今個星期輪到阿珍酒店前枱朋友C 爆住客大鑊。傳說中嘅酒店離譜眾生相「魚柳包放夾萬」原來係真人真事，話說一對強國嘅婆孫反鎖咗夾 萬打落前枱求救，其實年中都不知有幾多大頭蝦犯同樣錯誤，C 都司空見慣，咪搵保安一齊上去開鎖。成功解鎖後，保安「拯救」咗個魚柳包出嚟，大家以為係孫仔嘅惡作劇，正打算發火之際，婆婆伸手接住個包，懵然不知地問：「咦點解唔熱嘅？」嗯……C 已經唔知係好嬲定好笑。佢仲一口氣數埋以下麻煩住客個案，通通「有破壞、無建設」，整爛嘢罰錢都仲要講價，真係爭唔落啵！
酒店離譜眾生相內幕
•嫌毛巾唔夠吸水，抽起張床墊鋪落洗手間防跣！
•用企燈晾乾尼龍運動褲，最後成條褲燒溶整響警鐘。
• 猶 太人投訴鋅盆窒咗通唔到水，工程師一開發現堆塞大量廚餘，原來係佢 自己煮飯仔，仲惡人先告狀！
•鬼佬開P 玩到成地氈同天花都係紅酒，唔知仲以為係凶案現場！
勢估唔到，C 話最貴嘅並唔係Damage Fee，反而係清理費喎！所以壓軸嘅 「鬼佬開P 」罰款最「乸脷」，埋單盛惠萬五蚊吖唔該！至於其他損毁物品，亦有 不同「公價」可作參考。
