變種再進化！2015盞鬼 月餅 大預告！＠Charmaine
廣告
中秋 月餅 ，向來是兵家必爭之地，各家都整色整水，奇招盡出，分分鐘鬥得勁過書展口靚模！依家先七月中，Charmaine 已收到酒店公關千篇一律的宣傳，其中較有睇頭得海景嘉福酒店的威士忌 月餅 ，標明用 Glenfarclas 等名廠酒做，仲叫大家襯杯靚酒一齊食，尚算過癮！
酒店出品悶親人，好彩今年有茶記參戰，炒蛋權威華星冰室已公布出月餅，雖然是雙黃白蓮蓉，但總叫有新意！嫌茶記麻甩，靚仔霆鋒 chok 住樣為您炮製有蓮蓉和蛋黃的月餅味曲奇又點睇 ? Anyway，Charmaine 見到霆鋒張相就流晒口水了。
口說怕月餅肥，但又鍾意一口一個macaron的港女有福了！因為A La Bakery實行將兩者合而為一，創出mooncaron，實情是法式蛋糕仔Canel 加Macaron，咁邪惡嘅組合問你點忍。雪糕月餅方面，咖啡店Holly Brown今年以Gelato月餅加入戰團，更有藍色雲呢嗱月餅，有噱頭 ！卡通月餅呢？適逢豆腐人20周年，將會拍住望月推迷你奶皇月，仲送豆腐人公仔，應該又好睇又好食！
