誰說旅客市場係一嚿肥肉？＠杜遊珍

「中國旅客市場係一嚿肥肉，香港人偏偏鍾意食齋」呢個大道理，多得旅發局林主席早前賜教，阿珍可幸尚未「三高」，其實日日TST、CWB 人喼爭路，肥肉實在對港人身心造成嚴重負荷，究竟大家崇尚健康多啲，抑或追求經濟收益……嗱，等阿珍講個疑似有骨氣例子，希臘著名旅遊小島聖托里尼，面積豆膶約半個大嶼山咁上下，但旺季每日閒閒地引來過萬郵輪客登岸到訪，未計本身住在白屋仔嘅遊客，真係島都沉、人都癲！最近當地政府就決定限制郵輪客到每日8,000人，Thanks，呢個限額足夠保護小島、回應民意嗎？無人知，但對於負債纍纍之希臘，明明係飯碗來啊，肥豬肉放到入口都有骨氣唔狼吞，反而香港仲話大搞大嶼山旅遊，師主，畀條生路行下好嗎？