西澳州珀斯3大必玩篇@Travel佳

之前兩篇都集中喺北邊嘅大自然風景，今次到底去邊呢？我Travel佳決定帶大家「入城」，睇下西澳州首府珀斯（Perth）有乜咁正。Perth好玩精選其實點止3大吖？3大係我嘅重點推介，其他留返大家自己發掘啦。

推介1 伊利沙伯碼頭

Elizabeth Quay面對住貫穿起成個城市嘅Swan River，喺今年1月尾正式開放，好新㗎，以前去過Perth嘅朋友都值得再去睇睇。有澳洲朋友share咗攝影師Chris Kieran影嘅相俾我睇真啲，係幾正喎。Open day嗰日熱鬧唔在講，環境好舒服，地標Spanda個Look又夠搶眼，好有代表性。

碼頭附近有好多特色餐廳，最大賣點係啲露天噴水池，你知澳洲熱嗰陣有幾熱㗎啦…… 所以喺Quay玩水散步、食下嘢，已經係好正嘅活動。碼頭附近陸續會有好多新酒店登陸，COMO The Treasury、Ritz-Carlton Hotel、Crown Towers、Westin Hotel呢幾個大Brand都有份，你就知道Perth嘅旅遊配套會愈嚟愈完善啦。

Elizabeth Quay知多啲：goo.gl/EX5s4O

推介2 羅特尼斯島

Rottnest Island點解會入選我Travel佳重點推介？因為又近，風景又超靚。佢嘅定位就好似香港嘅長洲，不過面積有8倍，想探島可以喺Perth或者費裡曼圖（Fremantle）搭短程渡輪。呢個島空氣特別好，因為除咗固定班次嘅環島巴士就無其他車喇。好多遊客都會租單車四圍踩，自由自在又當做下運動。另外，有位「原居民」一定要介紹返，佢叫做短尾矮袋鼠（Quokka），係之前網上紅極一時嘅Selfie指定紅人，去開嘅朋友記得野生捕獲佢。

推介3 費裡曼圖 + 羅金厄姆

Fremantle同Rockingham係兩個小鎮，我覺得不妨一齊介紹．因為揸車嚟計，其實半個鐘多啲，就好似大埔同元朗咁上下距離。Fremantle係個有歷史嘅海港小鎮，啲街巷都保存咗唔少19世紀味道，係嗰度食下海鮮，欣賞下街頭藝人表演，好有Feel㗎。Rockingham都係港口小鎮，幾適合去行下沙灘、海邊公園，而佢最出名係坐船出海睇海豚，或者上企鵝島探企鵝，好近㗎，仲可以同海豚一齊游水混添。