西澳州大自然之旅卡爾巴里國家公園篇@Travel佳

眨下眼已經到咗2016年，話咁快又話過農曆新年喇，唔知大家呢個冬天有無出去旅行咁呢？Travel佳知道有啲朋友唔鍾意去旅行凍冰冰，帶厚衫怕麻煩，所以冬天反而選擇去南半球避寒，咁首選梗係澳洲啦。除咗大熱嘅悉尼、墨爾本呢啲城市，其實西澳州都好正㗎，我見喺新一年，唔少旅行社都主打西澳州嘅團，早排連電視都有旅遊節目介紹西澳州，Travel佳見到，都勾起唔少去西澳州玩嘅回憶。

卡爾巴里國家公園5大必睇位

西澳州好多嘢睇，我唔敢話好熟路，但比較出名嘅地方都去過下咁啦，Kalbarri National Park就係其中之一。呢個公園入面有好多奇特地貌，全部都係純天然形成，公園西面海岸嘅風景更加係出名壯觀。Travel佳印象中都有幾個好值得去嘅地點可以介紹下。

自然之窗Nature’s Window

呢個景點位置大約喺公園嘅正北方，可以話係去Kalbarri National Park嘅指定影相位。聽個名都知，佢就好似一個大自然嘅窗口，through佢去欣賞宏偉嘅峽谷、壯闊嘅河，真係另有一番風味㗎。如果你係影相友，留夜少少喺度哺埋個銀河景，應該都會好正。

110597 — 呢個咁嘅view真係人生幾何啊，喺度自拍一張放上網呃Like，真係無得輸。

布爾達木道Bigurda Trail

頭先提過嘅公園西岸就係呢個Kalbarri Coast喇，基本上好多奇石、懸崖地貌都集中喺呢個海岸。最正嘅係當局好有心思，沿住海岸最貼近懸崖嘅安全位置，整咗一條行人路，就係Bigurda Trail，平坦到玩滑板都得呀！泊好車，沿住呢條咁正嘅路慢慢行，一邊睇住印度洋無敵海景，一邊行山散步當做運動，真係完美嘅享受。