西澳州大自然之旅 傑拉爾頓篇@Travel佳
上次同大家介紹西澳州都仲係羊年，話咁快已經猴年，今次嚟到第2篇，想同你哋分享下西澳州另一個好正嘅地方，傑拉爾頓（Geraldton）。呢個臨海小城地方唔大，人口唔多，但好多嘢值得睇、值得玩，佢正對面海上嘅阿布洛霍斯群島（Abrolhos Islands），更加係保育得非常好嘅自然景區。加上由傑拉爾頓去赫特潟湖（Hutt Lagoon），只需要1個鐘左右，好方便。呢啲元素，都令呢個小城更加吸引，等Travel佳介紹番啦。
動靜皆宜 傑拉爾頓
好多朋友去澳洲都會想玩下水上活動，呢方面傑拉爾頓當然照顧到，而且全年平均氣溫都偏暖偏熱，幾時玩都唔怕凍。靜態觀光方面，景點一樣精彩。我就唔係太熱衷於劇烈運動嘅，反而鍾意了解下當地歷史，所以會去西澳州博物館；或者周圍影靚相，都有摩爾角燈塔、聖法蘭西斯維爾教堂呢啲獨特建築，當然唔少得地標之一皇家海軍悉尼二號紀念台（HMAS Sydney II Memorial）啦。
呢個紀念台背後有個故事，二戰時退役艦隻悉尼二號，喺附近海域發現喬裝做普通船嘅德國艦艇，兩邊開戰，兩敗俱傷，船上面645位澳洲海員壯烈犧牲。為咗紀念佢哋，起咗呢個台，加上優美嘅設計，成為當地意義特別嘅地標。
位於印度洋，喺正傑拉爾頓對出海面，由珊瑚礁組成，大家都認同佢係「西澳最後秘境」。呢個A級自然保護區，只得漁民同遊客可以登陸，而且遊客一定要即日離開，保育工作做得好好，所以先Keep到咁靚嘅風景。至於點樣去到呢個人間仙境？傑拉爾頓有得搭觀光飛機，可以帶你喺空中俯瞰超壯觀嘅122個珊瑚島！仲可以喺島上親近下珍貴嘅野生動物。而群島更加盛產龍蝦同珍珠，都係必食必買之選。
奇妙粉紅 赫特潟湖
西澳州當然有好多自然景致，但我仍然會話呢個係最奇妙嘅。佢嘅顏色梗唔係人造色素啦！主要嚟自湖入面獨特嘅藻類，所以佢會變色添。唔同時間、唔同季節，有時會係深紅色，而我都係覺得粉紅最靚。如果就得啱時間，朝早或者黃昏嘅陽光下睇，仲更加正。
Travel佳都介紹咗好多西澳州嘅大自然風光，希望大家都鍾意啦。至於下次嘅推介，同呢兩篇會幾唔同，我喺度賣個關子先，記得留意之後嘅新文章喇。而怕上次無睇嘅朋友Miss咗，下面同樣都有少少有做西澳州團嘅旅行社資料，俾各位參考番。
延伸閱讀：卡爾巴里國家公園篇
勝景遊
查詢熱線：2808 0833
精選西澳州團：西澳粉紅湖、酒鄉8天APA08（AL）
詳情：goo.gl/0VqMT0
康泰旅行社
查詢熱線：2108 8888
精選西澳州團：西澳珀斯7天團QPE07-MZZ
詳情：goo.gl/3PGkYi
金怡假期
查詢熱線：2804 1188
精選西澳州團：8天珀斯深度遊AP8TG
詳情：goo.gl/1HjBcp
如果想搵多啲資料自己研究下，記得去西澳州旅遊局同澳洲旅遊局個網喇。
西澳州旅遊局網頁：www.westernaustralia.com
澳洲旅遊局網頁：www.australia.com
