蘭桂坊再嬉戲@Dining娜
香港人工作忙碌、生活節奏快，全世界都知，講笑咁講真係揚威國際，好似蘭桂坊咁出名啊。可能就係因為生活太緊張，一有機會就想飲番杯、放鬆下。特別係喺中上環返工嘅朋友，無論係應酬、約同事定約朋友，對「老蘭」更加唔會陌生。嗱，講明先，我Dining娜絕對唔係喜愛夜蒲，不過同啲姐妹飲嘢，都離不開諾士佛臺同蘭桂坊㗎啦，Right？而近排蘭桂坊啲餐廳、酒吧，又開始做Promo喇，咁我就不妨推介幾間不時都會去嘅Bar俾大家，各有特色之餘，無論約Friend定係Dating，都好啱Feel㗎。
講真，呢間我諗都唔使點介紹，喺正蘭桂坊最當眼嘅位置，有Music Live Show、有露天位，有嘢食又有嘢飲，連T-shirt都有得賣，以酒吧嚟計真係好多元化。而且佢哋啲嘢食整得幾有心機，唔係隨隨便便Bar Snack咁簡單，有時有啲Set幾有驚喜添㗎。如果好彩嘅話，仲有機會見到傳說中好靚仔嘅韓系美男酒保，一路欣賞佢調酒，聽下音樂、飲番兩杯，係唔錯嘅享受。
講位置呢，佢就比較隱蔽，因為係上樓舖，但論氣氛一啲都唔輸蝕！橙橙紅紅嘅裝修，加埋牆上面好有Mood嘅相，真係有心機營造一個充滿古巴風情嘅環境俾你。古巴除咗雪茄、老爺車、音樂出名，Mojito呢款雞尾酒都係代表作，一定要試下。而每逢星期一，HAVANA仲會有英俊嘅外籍型男駐場開班，唔係教調酒，係教跳舞。聽住熱情嘅古巴音樂，欣賞大家浪漫起舞，真係別有一番風味啊。
我諗蒲開蘭桂坊嘅朋友一定唔會陌生，因為Volar都有番咁上下歷史，絕對係屬於唔使多介紹嗰啲。不過老實講，如果想認真傾下偈嘅，多數唔會嚟呢度，因為佢哋揀嘅音樂出名節奏感強，而且播得幾大聲㗎，配合番夠晒動感嘅裝修，係Match嘅，想郁動下、跳番Part舞嘅就啱晒。Volar久不久又會搞下Event，好似之前萬聖節就搞咗個喪屍之夜，我就無去，不過應該都好熱鬧，下次有大節日記得留意下。
講到呢間Zinc，我都係去過幾次先發現，尖東嘅Ra係佢姐妹店。Ra係用埃及做主題嘅酒吧兼餐廳，室內設計好有特色，而Zinc都一樣，雖然細間好多而且只賣酒，但裝修一啲都唔馬虎，正中間掛喺度個大鐘已經夠晒型，好有禪味，所以喺咁多間酒吧入面，呢度絕對係靜靜地傾偈嘅首選啊。
唔好以為呢度淨係得嘢飲會好寡，雞尾酒、啤酒、紅白酒選擇非常多，包你不醉無歸。
地址：中環德己立街35號地下（顯示地圖）
電話：2868 3448
網址：www.zinchk.com
後記
蘭桂坊固然係多姿多采，最緊要係無論餐廳定酒吧，耐唔耐就會同銀行Crossover下，搞下優惠，你諗下飲杯酒如果買一送一嘅話，抵好多㗎。近排好多間餐廳都同銀聯卡合作，唔止選擇多，優惠嘅內容都層出不窮，原價有折、送嘢食、送嘢飲、買一送一乜都有。如果想知多啲，自己去睇睇啦。
