藝術家 X 老房子 帶你邂逅經典建築
提起每個地方嘅歷史，一定唔可能忽略「建築物」呢一項。建築代表咗一個地方嘅歷史脈絡、社會變遷、人物風情等。藝術推廣辦事處今次籌劃「邂逅！ 老房子 」藝術計劃，希望大家重新思考舊建築物空間使用嘅可能性，藝術家們更喺舊有屋子上加上設計同全新佈置，依家就由佢地帶領大家邂逅香港以下 4 個歷史價值極高嘅 老房子 ！
石家豪 x 孫中山紀念館
石家豪喺堅尼地城長大，自小遊走中西區，同孫中山紀念館結下緣份。石家豪中學讀英皇書院，第一次入甘棠第就覺得同自己校園好似，同樣係歷史幢殖民地時期嘅歷史建築，最熟悉嘅係當然係紅磚嘅建築設計，份外親切。
要活化充滿歷史檔案同文物嘅孫中山紀念館，對於藝術家嚟講，最大嘅問題係視覺太單一。佢喺孫中山紀念館添置富不同時代風格嘅屏風，當中包括清代同治時期瓷器嘅廣彩圖案、19 世紀夏威夷嘅俗畫、維多利亞時期嘅牆紙裝飾等特色風格，希望可以帶領觀眾從呢啲色彩豐富文化符號，重新認識革命歷史喺現今社會嘅意義。
林嵐 x 三棟屋博物館
擁有四分一滿州血統嘅福鼎人林嵐12歲跟父母嚟到香港，同客家人一樣都係香港嘅「客」。呢座 老房子 令佢諗起客家人同自己嘅移民故事，佢希望可以喺 老房子 入面營造一種親切感，令參觀者感受咩係「客」嘅感覺。
為咗重現陳氏家族昔日喺三棟屋嘅生活片段，林嵐透過多個藝術裝置呈現，同時亦結合咗客家人嘅移民故事同個人經歷，創作咗一段南音音樂，當中體現非物質文化遺產嘅現代承傳，非常特別。
林東鵬 x 王屋村古屋
林東鵬3歲起已經喺沙田住，佢形容沙田係香港其中一個「城鄉並存」嘅地區，王屋嘅存在就好似文章嘅標點符號，調節住城市嘅節奏，連接起沙田嘅古今歷史。
透過由唔同地方收集得到嘅舊家具，林東鵬希望參觀者有一種似曾相識嘅感覺，從而回想自己嘅過去，重新探索歷史。佢將王屋村古屋呢個老房子，變成一個「可閱讀」同「可徘徊觀看」嘅互動空間。
黃麗貞 x 羅屋民俗館
黃麗貞一直喺柴灣返工，羅屋民俗館係港島東區少有嘅古老建築。喺「 老房子 」計劃下，佢認識到客家婦女刻苦耐勞嘅精神，於是嘗試將有別於傳統漢族婦女嘅精神特質同行為模式喺老房子中重現，從而向客家婦女致敬。
佢將羅屋民俗館嘅房間重新設計，最特別係將新嘅家具同白瓷造嘅衣物加入原有陳設之中。另外黃麗貞團隊成員陳翹康仲將客家帽變成一個個涼亭，放喺羅屋門前空地，為觀眾遮風擋雨，創意十足！佢希望參觀者可以穿梭古今，了解更多客家精神，思考點樣同呢類老建築連結。
