聖誕限定市集特色美食@Dining娜

一年容易又聖誕，咁歡樂嘅節日當然要約班三五知己出嚟相聚兼行下街搵好嘢食啦！於是我就約咗班姊妹嚟到PMQ元創方聖誕限定市集。

入到PMQ元創方，抬起頭就見到呢個全港首棵巨型全像投影聖誕樹，聖誕樹由點點燈光形成，喺半空不斷旋轉，仲幻化成唔同耀目顏色。聖誕樹旋轉嘅過程中有3首唔同嘅聖誕歌伴奏，令成個PMQ元創方都充滿濃厚聖誕氣氛！

PMQ元創方Let Your Joy Float全像投影聖誕樹

日期：2015年12月21日至 2016年1月3日

時間：6:00pm – 10:00pm（每15分鐘一次）

欣賞完聖誕樹，當然就係去搵好嘢食啦，唔好以為PMQ元創方淨係商店產品充滿創意，呢度連餐飲方面都好創新！除咗中式美食、英美菜式、法式甜品等各國美食外，市集入面仲有各種特色Fusion美食任你揀！

Imperial Wine Cellar迷人星空酒

行咗幾步，我同幾位姊妹已經被呢杯銀河氣泡酒深深吸引。早兩個月前PLATINVM嘅銀河氣泡酒一出現嘅時候已經火速成為網上熱話，而家銀河氣泡酒更進駐香港，我哋梗係要試一試啦！酒嘅味道清香微甜、口感順滑誘人，而且PLATINVM TV系列有6種顏色，包括Sliver、Gold、Ice Blue、Fire同全新 PLATINVM FRAGRANCE系列嘅夢幻紫，色彩幾咁鮮艷奪目，睇得又飲得！拎住杯咁靚嘅酒，啱晒鍾意自拍嘅姊妹啦。

Noodle and Dog 創意搞鬼特色熱狗

平時大家食嘅熱狗配搭總離唔開番茄腸仔芥末醬，但Noodle and Dog就話俾大家知，熱狗都可以好Fusion。Noodle and Dog精心為熱狗加入香港本土風味，例如「麵狗」就係以麵Crossover熱狗，用冷麵混合麻醬，再喺面層撒上南陵金卷炸魚仔。我哋就揀咗「聖誕狗」應下節，紅紅綠綠嘅顏色同聖誕夠晒match！材料包括蜜桃、中華沙律同杞子，食落酸酸甜甜仲好開胃添。