結婚生仔等於去街市買菜？@小盛女

「無咁快啦，我哋仲儲緊錢，而家啲樓咁貴。」我說。
「所以咪要早啲結婚生仔排公屋囉，生得愈多，排得愈快呀！」大姨媽說。
「三人家庭條隊都要排六年以上㗎，而且租樓都唔平。」我說。
「咁都無辦法，一係你扮有精神病囉，而家係要咁先拎到屋。」大姨媽說。

新年流流總會被問到何時結婚生小朋友，從前我會天真地說：「最理想呢就係28歲結婚，30歲生小朋友。」但慢慢我開始發現這根本是個不可能的任務，經濟能力是一大因素，現在樓價太貴，結婚後總要有個地方住，排公屋？排到2046年也未能上車；租屋？即是幫人供樓，而且一開始了租屋之路，更加沒可能買樓；買樓？九成按揭的首期也拿不出來。

明明我有努力讀書和工作，加班在所不辭，每月也有儲蓄，但樓價升幅總是快到坐直升機一樣，我和男友也討論過這個問題很多次，但每次也是沒結果，只能一邊儲錢一邊希望中六合彩/抽到居屋。

「樓價只會愈升愈貴，是但買咗間細嘅先啦。」舅父說。

「我都想，但真係好貴，幾百萬買間劏房真係買唔落手。」我說。
「以前你阿婆都窮啦，咪又係生到四、五個，天生天養咋嘛。」舅父說。
「年代唔同咗㗎喇，總之我哋而家兩個都未搞掂，唔會諗生仔咁遠啦。」我說。

《嚦咕嚦咕新年財》劇照

旁觀者總是能輕鬆地說：「婚平有平結、仔平有平養。」好像結婚和生小朋友就如到街市買菜一樣容易，但其實大家都是隨口話當秘笈，不用負責任的，所以聽完笑完便算。再者，我又不是生仔機器，生仔不應是為了排公屋，這個責任是要負一輩子的。

如果兩個人的生活也未能好好打算，又何必生小朋友呢？累人累己，雖然很多人都說「船到橋頭自然直」，或許是我太悲觀而且不夠成熟，未準備好當人老婆/媽媽吧？常常說沒錢買樓所以不結婚不生小朋友，其實真的是因為錢，還是有其他原因？