糖糖@Ellenpedia

有網友話俾血糖低既人臨時做救命神丹，此為其用途之一。但係要澄清既係，我地都OK人道既，咁既情況下與其打開佢個口夾生倒包糖落去，不如俾杯芒果杯咁佢飲仲好啦。

女人係好creative既動物。有錢就自然可以買護膚品扮靚，冇錢都大把獨門偏方保持青春美麗，例如咩搵洗米水洗頭，青瓜敷面，蛋白清黑頭，豆腐洗面等等。係飛機上既資源特別少，如果自己帶hand cream係land之前已經唔見左，但係對手又成日乾到好似魔術貼咁，咁點呢？？？有人竟然諗到用牛油同糖溝埋一齊做hand mask！！！我試過同班女人一齊顛，敷左五分鐘後去洗手，但係陣騷味揮之不去，keep住傳黎個鼻到，唔知點樣辟走佢，好無助。事實可能係真係好似佢地講到咁有用，但係我成程機都keep住作嘔既感覺，所以我都都係寧願用番hand cream。

咁點解我講到啲糖咁偉大呢，其實係咁既，佢真係救過好多人在跣與唔跣既邊緣之間。啲空姐（可能係我啫……）幾粗魯，踢cart呢啲野秒秒都做緊架啦，推呀撞呀呢啲更加唔少得，彷彿當個cart係仇人咁。但係啲cart唔係萬能架，佢地都會有虧既一日，有時係一邊大力啲推啲餐盤入去，對面又閂唔實架話，哇塞，Merry Christmas！！！！！！！！！！啲充滿住食物渣宰既tray就會好似海嘯咁排山倒海咁倒晒出黎！！！你執得番啲餐盤啫，但係你執唔到啲咖喱／yoghurt／芒果汁既「cocktail」，任你點樣用紙巾（甚至blanket）起勢咁抹，個地下都仲係滑既。咁冇人想亞太區有一天會成為亞太區係度既，所以我地會開幾包糖好似仙女撒花咁撒落地下，為求營造番個凹凸感，糖糖真係救人一命，勝造七級浮屠，包你唔會車毀人亡。

咁所以糖係咪好偉大呢。我講完啦，多謝。（拍手）
圖片來源：http://www.jabefitness.com