【直擊河國榮返家鄉】 昆士蘭・Home中奇遇：布里斯班4大必食餐廳 @ Travel佳
河國榮昆士蘭Home中奇遇，第2站我哋返到昆士蘭洲嘅首府布里斯班（Brisbane）。入到大城市，河國榮就話最緊要梗係要食好西啦！呢幾年布里斯班開咗好多來頭唔少嘅餐廳，有名廚餐廳、又有排長龍甜品店，特別係Southbank一帶就更加夜夜笙歌，半夜三更都有得開餐！
[embedyt]第一站 堅唔離地！$150有找食澳洲名廚早餐！
講到布里斯班嘅風頭躉餐廳，河國榮就話絕對唔可以錯過由澳洲名廚Ben O’Donoghue開設嘅餐廳Billykart。Ben曾經喺澳洲多間高級餐廳任職，2000-2003年更加喺倫敦Monte’s Club同Jamie Oliver共事。佢曾經喺澳洲、英國同美國嘅電視節目上帶隊搵食同教煮餸，喺澳洲就更加喺入晒屋嘅名人。Ben喺布里斯班開設嘅Billykart共有2間分店，分別位於West End同Annerley，而今次河國榮就帶我哋去到West End店潮聖佢嘅早餐menu。
咪以為食名廚餐廳就要smart causal上身，無番幾千蚊都落唔到樓，喺昆士蘭絕對輕輕鬆鬆食得自在！Ben嘅飲食哲學奉行casual sophistication，一切以簡約為主，亦擅長將澳洲新鮮嘅食材加入亞洲元素，之前更加特別嚟香港大澳搜羅蝦膏番澳洲作素材。
講番West End店，店面以半開放式設計，兼裝上南半球最大嘅greenwall，氣氛夠晒relax，為配合本地熱辣辣嘅天氣，食物都以簡單清新口味為主，特別係早餐菜式。更抵讚嘅係，主菜menu最貴都只係AUD$23.5（約HK$141），堅唔離哋嘅價錢，就可以懶洋洋咁慢食兩三個鐘，好好享受慢活嘅滋味。
Billykart嘅招牌菜，一定要提Aussie Asian Eggs with King Prawns Bacon & Chilli and Date（AUD23.5 / HKD$141）。呢度菜係澳洲街之巷聞嘅名菜，咪以為係一隻煎蛋咁簡單，食落就會發現一啲油膩感都冇，咬落仲出奇地鬆脆，唔講仲以為係隻炸蛋。最特別仲係入面滲透蠔油同少許辣味，加上本地餐嘅大虎蝦同煙肉，亞洲口味同澳洲口味喺口中同步大放異彩，實在非常驚喜。
食完炸蛋，另一個Spanner Crab & Scallop Congee, Pickled Ginger, Crispy Shallots（AUD $17.5 / HKD$105）更加唔可以錯過。可能你會話萬里迢迢嚟到澳洲都食粥，但it’s really not a joke！一個澳洲人可以將粥煮到軟綿綿本身已經攞滿分，當中帶子嘅鮮味更加極為突出，加入埋亞洲唔同地方嘅口味，如港式炸蒜同日本酸薑等，口味和諧得嚟又超開胃。對港式口味情有獨鍾嘅河國榮都大讚夠晒特別，明明食飽咗早餐嘅記者，仲一口氣食咗3碗添！
想試清新一啲嘅口味，另一款Crispy Corn Fritters, Grilled Avocado, Heirloom Tomatoes, Chilli（AUD$18.5 / HKD$111）就最好不過，粟米餅一啲都唔油膩，咬落清脆，仲有口味非常refreshing嘅牛油果，實在係營養之選。
喺Billykart食早餐，除咗要試下Ben嘅手勢外，更加要試埋店入面嘅咖啡，Ben搵嚟布里斯班近期最人氣嘅咖啡店Campos駐場，呢間咖啡店被當地媒體評為Australia’s Favorite Coffee，我哋品嘗嘅Flat White（AUD$3.5 / HKD$21）香醇可口，實在值得一試。
Billykart West End
地址：2-4 Edmondstone St, West End QLD 4101
電話：+61 (0) 7 3177 9477
營業時間：7am-late（星期日至及一營業至5pm）
網址：http://billykart.com.au/west-end
第二站 $69怒食！澳洲最新鮮生蠔
去澳洲旅行，點少得食生蠔？不過墨爾本有Victoria Market、悉尼有Fish Market，布里斯班又可以去邊食呢？身為地膽嘅河國榮就帶我地去到Morningside嘅Fish Factory，呢度係布里斯班嘅海鮮批發集散地，每朝清晨來自全澳洲各地嘅新鮮海鮮就會空運到呢度，想喺布里斯班品嘗最新鮮嘅海產，呢度就最好不過。
呢度嘅海鮮種類多達數十種，而生蠔當然係最受歡迎，部分更加係即叫即開，生蠔嘅品種同大小都有唔少選擇，包括體型較小但味道較重嘅Rock Oyster（AUD$11.5 / HKD$69 一打）、體型較大較適合新手嘅Pacific Oyster（AUD$18.5 / HKD$111 一打）。
Fish Factory嘅老闆就話，生蠔一年四季都有得食，但想食到最肥美嘅生蠔就要喺澳洲嘅冬季（5月至8月）嚟食喇！雖然我哋採訪之時只係秋天，但生蠔一樣都係咁creamy可口，一行5個人，足足食咗4打先夠！
除咗生蠔，河國榮亦到推介咗好多澳洲必食嘅海產俾大家，特別係昆士蘭產嘅巨型King Prawn同泥蟹，King Prawn剝咗殼就可以即食，啖啖肉不得止仲鮮味十足。如果你住喺service apartment嘅話，買番幾隻泥蟹或者同樣係澳洲必食嘅三文魚、青口、龍蝦番去煮番幾味都只係$300-400港紙左右咋！
不過，本身係內陸人嘅河國榮就話，食海產佢始終最鍾情cooked food，喺Fish Market入面就個Cafe，提供fish and chips、Burgers及Grilled Seafood等選擇，當中亦套餐選擇，河國榮就推介Platter for Two（AUD$30.5 / HKD$183），入面除咗有炸魚外，仲有魷魚圈同大量薯條，5個人都食唔晒吖！
The Fish Factory
地址：363 Lytton Rd, Morningside, QLD 4170
電話：+61 (0) 7 3399 9888
營業時間：7am – 6pm（星期日9am起營業）
地址：http://www.fishfactory.com.au
第三站 極邪惡！特甜冬甩奶昔
澳洲人鍾意食甜嘢相信大家都知，而呢期紅爆當地Instagram嘅，相信就喺冬甩店Doughunt Time，呢間源自布里斯班嘅冬甩店，人氣由當地一直殺到落去南面嘅黃金海岸、悉尼同墨爾本，每當大家上IG搵有關冬甩嘅hashtag總走唔甩佢嘅縱影。至勝關鍵係乜？除咗每個月都推出古靈精怪嘅口味外，仲有極邪惡嘅特甜冬甩奶昔！
門店每日都有12種口味供應，最受當地人歡迎嘅始終係最甜或者最colorful嘅口味，例如鋪滿M&M嘅Slim Shady同埋多層鋪滿cream嘅Creme de la Creme就最多人買！而可以任揀6款嘅冬甩禮盒就最受當地人歡迎，更有唔少人轉程嚟買番香港添！
講番邪惡之王冬甩特飲，一共有4款，包括以澳洲朱古力品牌Tim Tam crossover嘅The Tim Tam Slam、以昆士蘭最出名嘅水果香蕉製作嘅The Sunshine State、混入大量花生醬、花生碎同朱古力嘅The Nutter，及以士多啤梨同綿花糖作toppings嘅Strawberry Doughnut（各AUD$10.5 / HKD$63）。
Doughnut Time
地址：39 Alfred Street, Fortitude Valley
營業時間：8am – Late Night
網址：http://www.doughnuttime.com.au
第四站 越夜越旺！Southbank 人氣甜品Bar
講到布里斯班最人氣嘅「夜場」…講緊食宵夜果啲吖！當然要帶大家去到Southbank，呢到潮人食肆、甜品店林立，而且步行去city都係10分鐘左右，幾夜去搵食都冇所謂！當中，當然要介紹昆士蘭第一間嘅甜品cocktail bar Cowch，呢間甜品店開業只有半年，但每晚想搵個位坐都難，唔只有酒飲，仲有好多古靈精怪嘅甜品添！
打開menu，好容易就會比佢地上百款嘅甜品吸引，河國榮就特別推介2款睇到都覺得得意嘅必食推介：雪條同pizza！先講雪條（Naked Pop, AUD$8.95 / HKD$53.7），甜品bar入面有個大大嘅雪條櫃掛滿唔同口味嘅雪條，本身已經吸引，最正仲係客人可以選擇加入唔同嘅醬料同toppings，包括朱古力、花生醬、熱情果醬同不同果肉等，淨係個樣都已經夠晒吸引！河國榮仲特別提醒大家，記住要食加朱古力醬，只要攤一灘立即變得香脆可口，更加有質感。
另一番嘅Dessert Pizza，選擇亦有7款之多，喺香脆嘅餅底上加上唔同嘅朱古力或花生醬，再配上不同嘅水果同甜品配料，我哋就揀咗最受歡迎嘅Strawberry Blonde Dessert Pizza（AUD$17.95 / HKD$107.7），入面用咗白朱古力醬底，滲上大量香蕉、士多啤梨同綿花糖，口味比想像中冇咁甜，而且水果多汁肉嫩，非常配襯！
Cowch
地址：2/179 Grey Street, South Bank QLD 4101
電話：+61 (0) 7 3844 1559
營業時間：7am – 12mn（星期日至四營業至10pm）
網址：http://cowch.com.au
住宿推介！布里斯班首間 Art Hotel
要喺布里斯班搵食，住邊先方便？推介位於Fortitude Valley嘅TRYP by Wyndham，酒店距離市中心和Southbank只需10分鐘車程，地處相當方便，大家玩夜咗都唔怕！而且酒店由一座150年嘅舊大樓改造，加入大量玩味十足嘅藝術品和型格狀飾，例如大堂嘅大型牛角擺切同處處嘅塗鴉牆，型得嚟又啱大家可以影上upload上網！
雖然主打藝術酒店，酒店嘅房間依然舒適度十足，仲處處心思，當中包括可上網同隨意移動角度的吊牆電視、窗廉等設備更是全電動，十分方便。除咗房間，更特別要一提酒店嘅餐廳Chur，除咗有十多種唔同選擇嘅burger外，每朝A la carte嘅早餐款式更接近10種，每日都俾到唔同嘅心思大家。
TRYP by Wyndham
地址：14-20 Constance Street, Fortitude Valley, QLD 4006
電話：+61 (0) 7 3319 7888
房價：AUD$129 / HKD$774 起
網址：http://www.trypbrisbane.com
點飛最抵？澳航$5,170直航布里斯班
今次河國榮返家鄉，就選搭咗澳洲航空（Qantas）嘅航班。澳航每日都有一班直航香港至布里斯班嘅航班，比你可以一次過玩盡布里斯班同黃金海岸。即使乘坐經濟客位，每人都獨享30kg嘅寄艙行李配額，連飛機餐都有4款選擇，加上特大屏幕比你打機或睇戲，8個幾鐘嘅航程話咁快就過！而家澳航做緊$5,170直航當地嘅優惠，快啲上去訂票啦！
有到日本旅遊前要了解的實用資料嗎？
日本是香港人最愛的兩大旅遊地點，去旅行前必看5大旅遊保險保障新冠肺炎的比較，另外為你推介日本10大好用電話卡，亦可參考日本8大Wifi蛋推介。當然亦要事先了解日本地區天氣、電壓、電源插頭、入境簽證要求及大使館電話。
