【 生果盅 大比併】食生果最豪食法 西瓜Vs菠蘿Vs木瓜＠大仁生活
我第一次接觸就是在今年青衣大戲棚, 食原隻西瓜盅…老實又真的好過癮, 但因為外賣, 沒有鐵匙羹, 所以當日西瓜底部的肉太浪費…
大圍有新開街坊韓國菜館, (只開業不足三期), 內裡就有原隻菠蘿沙冰, 正到爆!!
店員家倫:「真係㗎…你有冇興趣入廚房睇睇??」(我咁八卦, 梗係求之不得啦…)
家倫專登選了一個大號菠蘿給我作示範…(真係十幾箱菠蘿疊到人咁高喎)
阿軒一邊切菠蘿, 我一邊問:「係米你哋抄青衣大戲棚個西瓜特飲呀??」
家倫:「唔係喎…E個菠蘿沙冰係韓國好普遍㗎咋, 通街都係, 可能香港無人整啫…」(未去過韓國嘅我, 仲以為新嘢…真係好OUT!)
阿軒手執專用刀扭出原個菠蘿肉, 將菠蘿心棄掉, 之後加冰加水, 連同菠蘿肉攪伴變沙冰, 再倒回入菠蘿就成為原汁原味的菠蘿沙冰.
軒:「一日平均開百幾個菠蘿…(吓??咁米開到手痹?), 唔會, 我哋有三個同事一齊, 不過另外兩個去咗食飯啫」(日日撬30個菠蘿都幾係嘢)
家倫:「其實, 我哋通常下晝5點幾就開定D菠蘿, 所以唔駛佢哋三個咁趕囉」
菠蘿沙冰好搶眼, 又夠甜, 不會太酸, 而且就附又兩片菠蘿肉, 絶對是2人份量, 雖然我不太好沙冰, 但都覺得吸引. ($58蚊鮮果汁特飲…超抵啦…我見真係枱枱都叫架)
味道: ★★★★
呃Like指數: ★★★★★
推介度: ★★★★★
原來, 對於九龍仁來說, 要食原隻 生果盅 , 根本不用山長水遠走去新翠邨, 因為旺角黑布街一樣有…(我好Out, 原來已經有了兩年添…今次真係超老套)
這間糖水舖, 我經常由紅磡坐小巴回旺角都見到, 可以說「睇住佢開」, 但從來未有衝動去試食, 想不到竟然禾稈冚珍珠.
她們下午4時營業, 今日我3時左右到達, Ashley:「唔緊要, 我哋都已經開咗架啦」(真正…今日成為佢哋第一個客添!!)
我:「唔該一個西瓜盅, 一個菠蘿盅」, Amy說:「唔好意思, 菠蘿有時令, 暫時未有, 不如要木瓜, 但要等, 我哋要出去買…木瓜只出咗一個星期」(好嘢??等等等…點都等)
於是今日便點了雙瓜盅. 我問:「三款生果盅, 邊款最多人叫?), Amy一邊幫我挖空西瓜, 一邊說:「一定係西瓜, 平均每日都賣到廿幾個, 夏天夠涼麻」
(點解咁大個蜜瓜, 係米有蜜瓜盅?) 女店員答:「唔係呀! 蜜瓜做盅太大個喇, 我哋係用嗰D蜜瓜粒啫…」
西瓜盅是先挖走大約三份二的西瓜肉, 再放入雜果, 及雪糕. (Amy好快手, 5分鐘已經挖定半打西瓜…勁呀!磨打手一樣)
三款生果盅, 都是先可以選擇黑珍珠, 涼粉, 或西米做底, 之後雜果就有齊火龍果, 芒果, 蜜瓜, 西瓜, 雪糕則可以8款揀一款.
其實我心諗, 又要挖又要重新逐粒放回入盅內, 真的好花功夫.(日日係咁挖, 都唔知駛唔駛睇鐵打添)
鎅開的西瓜蓋, 每一個尖角也放一粒士多啤梨, 出來效果好靚, 似十足一個太陽, Ashley:「影相呃Like好啱架.」
味道: ★★★★
呃Like指數: ★★★★★
推介度: ★★★★★
(係米三個生果盅全部都係新推出架?) Ashley:「我哋個西瓜2年前開舖就有, 菠蘿就上年有囉」(咁耐架喇, 唔掛之得前面都有間舖抄你哋啦)
木瓜盅的製作情況與西瓜相約, 不過Ashley要先將中間的果籽全部清理, 才將木瓜肉挖走, 再舖上雜果. (即係又再多咗一重功夫)
不過木瓜就則是「見幾多, 食幾多」, 今次我配了荔枝味雪糕, 為木瓜盅加了不少分.
(如果木瓜盅外圍也舖上生果, 黑珍珠, 則似十足小舢舨暢遊生果河中…應該超正得多)
原來, 生果盅的雜果可以自行揀選, 早知我叫佢走火龍果, 畀多啲芒果我啦…蝕底, 因為我都唔鍾意食火龍果.
木瓜盅與西瓜盅的價錢一樣, 不過…感覺西瓜抵得多, 因為西瓜內膽大得多, 而且吃畢雪糕, 雜果, 及涼粉後, 還有四份一西瓜肉可以食.
因為「食極都有」, 我還是強烈推介西瓜盅, 又甜又涼又大件. (都係嗰句…下次嚟…私人整份蜜瓜盅我啦…夕張蜜瓜…唔該)
味道: ★★★
呃Like指數: ★★★
推介度: ★★★
Sister Korea Café
地址: 沙田大圍新翠邨新翠商場地下17,18&18A鋪
電話:2596 0018
Captain糖甜品專門店
地址: 旺角黑布街88號地下
延伸閱讀：
