但最近為左一班 Friend掕Friend 識嘅日本新朋友，
我竟然喺一個月內兩次犧牲最愛嘅瞓覺時間，
6點幾眼屎都未抺乾淨就出發參加兩次活動，
而且兩次都係我喺香港十世都唔會去一次嘅BBQ！
點解我要咁虐待自己？
因為有啲野，真係試左一次，就有第二次⋯⋯
兩次嘅目的地係離東京市中心約兩個鐘車程嘅神奈川縣，
第一次係有無敵海景嘅「觀音崎公園」燒烤場，
今次係一個叫「清川村」嘅地方，
起初以為都係海邊燒烤，點知今次深入山澗，
來一個「川燒」♡
沿著河川嘅石路就喺我地嘅燒烤場，
背靠綠樹，放眼群山，加上潺潺流水BGM，
吸一口極上清新空氣，本來暈車浪都即刻好返晒！
唔似香港用燒烤叉，日本人慣用網燒，
通常啲男人都會勁Gentleman咁負責燒晒。
起好個爐就係呢位「河戶君」大顯身手嘅時候，
佢喺肉店返工，係一個專業「醃肉師」，
兩次BBQ嘅靚肉都係由佢一手包辦，
肥美豬肉、高級和牛、自家製免治雞扒⋯⋯
專人煮理嘅炭火燒肉，啖啖脂香肉嫩兼極度Juicy，
我呢隻食肉獸梗係一舊接一舊欲罷不能，
再大啖大啖
啤酒灌入喉嚨，
狂擦邊豪飲吹吹水，真係人生一大樂事！
一輪烤肉混戰後，
仲要攞燻製煙肉滴出嘅油來炒麵埋齋，
問你死未！
未食得住～
因為要用來玩日本人嘅例牌壓軸遊戲： 擘西瓜！
睇日劇以為好易，但轉左幾圈真係唔知邊忽東南西北⋯⋯
結果輪流玩晒都無人中，
最後又搵河戶君出馬KO佢！
雖然舊西瓜唔算特別甜，
但就食到一種懶青春嘅味道。
又食又玩大半日，
離走時夾返錢，計埋場地費每人200幾蚊，
真係捱下眼瞓又點話〜
