激新5大澳門娛樂必到呃like位@TRAVEL佳
十月初五一睇完個月光我就即刻忍唔住過澳門搵君好食件豬肉乾。其實澳門又點止賭場，仲有大把嘢玩。今次一場嚟到，就同大家介紹上個月新鮮滾熱辣開幕嘅新濠影滙。聽講呢間酒店好巴閉，耗資32億美元，用電影世界作為主題，開幕嘅時候仲請咗荷里活巨星羅拔‧狄尼路先生（Robert De Niro）、里安納度‧狄卡比奧先生(Leonardo DiCaprio)，奧斯卡金像導演馬田‧史高西斯先生(Martin Scorsese)及荷里活著名監製畢維納先生(Brett Ratner)參演開幕電影《選角風雲》添，你都咪話唔架勢堂。
Checkpoint 1：巨星衝擊 打造勁離地摩天輪
話明電影世界又點可以冇荷里活鉅作嘅情節：兩幢酒店大樓之間，突然有2粒熾熱行星一齊劃過，喺離地130米高嘅大樓外牆留低咗一個幾乎完美嘅「8」字，咁就形成「影滙之星」呢個8字形摩天輪。
Checkpoint 2：90分鐘送你來回地獄與人間
稍微知道魔術嘅人都應該知邊個係法蘭茲‧哈拉瑞（Franz Harary），被稱為「最佳逃脫大師」嘅佢嚟到「魔幻間」。曾經變走米高積遜、珍納積遜，同美國太空總署甘迺迪太空中心入面部穿梭機，咁你話巴唔巴閉？刀鋸美人、火海逃生冇穿冇爛就梗㗎啦，唔劇透太多，留番你地自己睇。
Checkpoint 3：蝙蝠俠迷揮手打卡位
「蝙蝠俠夜神飛馳」，呢個全球第一個以DC漫畫超級英雄蝙蝠俠為主題嘅4D多媒體飛行體驗，想威威豬嘅蝙蝠俠迷點可以走雞唔打卡。完全唔使戴3D眼鏡，零距離同Batman喺高樓大廈裡面左穿右插，一齊守護葛咸城。
Checkpoint 4：華納樂園 Fun分享
我深明我嘅讀者中肯肯定有已為人父嘅師兄，呢個佔地4千平方米嘅「華納滿Fun童樂園」就啱晒你，以一班華納兄弟同DC漫畫英雄做主題，啲機動遊戲望落好似小兒科，但其實有啲遊戲大人仲難玩過細路，挑戰性滿分！其實除咗機動遊戲仲可以喺到搞埋生日party，重拾一下童真嘛。
Checkpoint 5：出國濕平話咁易
冇長假同BB豬（如果你有）去歐遊？一次過去齊紐約時代廣場、荷里活比華利山你又點睇先？「新濠影滙購物大道」有得selfie有得濕平有得瞬間睇晒幾個國際地標。
後記：
其實去澳門愈嚟愈平，雖然玩2日1夜又要返香港面對現實世界。但原來2日淨係留喺新濠影滙行程都豐富到玩唔晒。就趁依家推出勁多平價套票，$1698都已經可以住「巨星滙」，又包埋「影滙之星」同「蝙蝠俠夜神飛馳」2張飛，仲有早餐buffet，抵玩推薦呀，快啲報名啦！
新濠影滙
地址：澳門路氹連貫公路 (顯示地圖)
電話：(853) 8865 8888
