澳門發圍、港媒當災！ 行程安排密質質，何苦？@杜遊珍
廣告
我知！澳門又有新酒店好應該普天同慶，但開幕當日龍捲風式嘅掃場安排令阿珍我不得不為港媒發聲！其實自威尼B人起，每次澳門有大型娛樂城開幕，媒體Preview 嘅的行程一向都係打仗咁亂，勢估唔到一直無變過！
走馬看花鴨仔團 為乜先？
眾所周知，大部分港媒慣例要有詳盡報導交差，採訪與打燈影相、甚至拍片都需時，偏偏開幕當日，大會嘅安排爭分奪秒，幾乎3分鐘一個景點，如果齋行梗得啦！咁嘅行程根本只影到環境相，想話影下細節真係無可能。而且一團接一團，即使當日某餐廳大廚表示等四分鐘可以煮個麵出來影，都等唔切！皆因下團又殺到！行家Ｈ就忍不住網上實時分享呢個能人所不能嘅行程，究竟實行度幾高，只能無奈地盛讚啲門口真係好睇！最後完晒都遲咗十幾分鐘，無嘅，咪又係响自由時間度回扣番囉！
衰內部人手狂換 公關兩邊不是人
澳門線行家K就話今年已叫有所改善，因為有晏食！早年佢就試過大會根本無安排食飯時間，搞到佢當日見酒店高層路過時，勁想攔途申冤咁滯！佢又分析，能有如此「聰明」安排，全因酒店內部人手經常換血，由不熟媒體運作的新手擬定行程，當然唔理解媒體需要啦。公關反而夾响中間盡力配合記者，搞到大家都好辛苦！說到底大家响報章雜誌能夠見到好睇報道與開心畫面，背後全靠一班專業港媒高強嘅工作效率，識走位，應變能力又高，阿珍真係要向佢哋致敬，希望有日情況得以改善啦！
