法國人自豪了@陳細

Aug 28 2015

故事發生在我家附近一眾有錢阿太聚集的商店街, 拿著終於影完的菲林, 很心急想去沖曬。人在店等著, 一個挽住H手袋曬到變成橙色的阿太招招搖搖地打尖, 要店員幫她打印電話裡頭總共1000張相片, 店員又真的開始服務, 無視在旁邊默默罰企了五分鐘的我。排隊文化似乎並不在法國人的每一個生活細節中, 最起碼搭地鐵等巴士上酒吧和去沖菲林是這樣, 常常是我傻痴痴在排隊, 最後上唔到車。

算啦, 反正就是要等。沖印菲林是個煎熬的體驗, 無得即食, 好不容易影完一捲拿去沖, 反正就是要等。每次到手, 站在人家的店鬥雞眼足半天去望那少少的一張索引, 然後快快跑回家在電腦前好好看清楚。好麻煩, 但鬼叫它咁可愛咁有魅力。

來到歐洲更麻煩, 每次沖印不是等三日就是等一星期。這一次對方說四個鐘, 收舖前可以拎。下? 我非常非常驚訝, 忍唔住問店員, 咁快既? 平時最快都要兩日。呢個moment, 店裡的法國人就自豪了, 有人說: 「這就是效率! 我們在法國嘛! 」有人接: 「無錯, 法國是高科技國家! 」連橙色阿太也搭訕: 「係呀! 電話影完一千張相, 轉個頭就印起成本相簿喇!」喂, 打尖都未同佢計數, 仲走來打訕, 果然是很任性的民族。我眇左一下嘴。有人以為我是大和女子:「我知日本都未必有咁先進, 四個鐘沖一捲菲林其實都唔算快喇! 法國是個很方便的國家……」

笑而不語, 心諗, 半日的確係快既, 但你地真係未去過香港, 又未必知, 全世界都愛說法國人最叻就係慢。