機師背後的女人 @ Mr. Pilot

無錯，機師背後的女人，at least 在工作上，就是令眾人神魂顛倒，男士趨之若鶩的空姐。

我有一位行外的朋友，因為工作關係常常要搭飛機。可能因為常常見面而日久生情，我們每次見面總會提起「空姐」這話題，連帶其他朋友都不勝其煩，半說笑的話：「你地可唔可以有一次唔提空姐呢兩個字？」無他，正如大部份男人一樣，我呢位朋友有佢嘅 fantasy。

每次我朋友叫我介紹空姐給他認識時，我總是反過來說，應該是他介紹空姐給我認識才對。原因很簡單：上到飛機後，機師同空中服務員根本就各有各做。除了在機頭 galley serve cockpit 的幾個 crew 之外，其他 crew 我根本連見也見不到。我朋友作為乘客，一班機跟空姐們的溝通可能多過我十班機加埋。

作為一個機師，其實我覺得我的職業對追女仔（尤其係空姐）而言是一個劣勢。何出此言呢？

當你幻想一個飛機師的人品時，可能會被電影電視影響，覺得飛機師一定為人風流，四處流情，仲要成日四圍飛，想箍都箍唔住。同樣地，空姐們的想法也或多或少受到影響。

在飛機上，機師在飛行途中需要的任何東西（食嘢飲嘢去廁所）都可以在飛機最前面的 galley 解決， 就連長途機的休息地方都是在機頭（空中巴士 A340 除外）。所以在飛行途中，如果機師在飛機中間甚至機尾的 galley 出現，基本上未出聲就會被標誌為「獵食 mode」，咁啲「獵物」係咪會自己提高警覺先？

好了，到達 outport 了。空姐人數就一定多過機師，而人類是群體的動物，所以大家所屬組別會先行埋堆。若果機師（們）想約空姐（們）食個便飯，就必須厚住面皮，以寡敵眾，排除萬難地當眾邀約。但是當一群人同時被邀請的時候，除非年資最高的先開口答應，其他人大多都會保持矜持，採取沈默是金的態度，成事機會率亦因此下降。

其實在空姐們的角度出發，飛行期間佢地已經忙到甩轆。到 outport 後，如果係短途機，休息時間短，食飯或夠訓就只能二揀一。如果係長途機，飛完十幾個鐘，咩都第二日先算啦！問題黎啦，第二日，大家冇大家嘅 contact，點約？

有一點大家可能會忽略的，就是航空公司大小對機師空姐一起的比例的影響。舉個例，我有朋友在日本一小型航空公司任職，全公司只有 120 個機師及 400 個空姐，而且全都是同一個 base。除了常常一起飛之外，還有很多聯誼活動，大家亦較容易發展感情。反觀本港的航空公司，小的就像我朋友的日本公司般，但最大的就有超過 2800 個機師及 10000 個空中服務員。即使一起飛過，很可能要好幾年才有機會一起再飛，若一方想發展關係，相對亦較為困難。

當然，有機師會採取主動去結識甚至追求空姐，而每次空姐們都會立即啟動情報網絡，四出打聽任何與追求者有關的資料。因此，我亦多次被空姐朋友問：「喂你識唔識邊個邊個呀？佢追我個 friend 呀！佢係咪成日溝女㗎？」

有人追即係有人被追，而有人被追即係有人接受，所以的確有一定數量的空姐無論在工作上還是生活上都是機師背後的女人。這些像牛郎織女般可歌可泣的愛情故事，就留待下回分解吧。