機上食好西！ 自備飛機餐貼士＠杜遊珍
廣告
過年前網上瘋傳魚翅航空的毛毛牛脷飛機餐，睇見都唔開胃，食飛機餐咁易中伏，真係可免則免，如果要醫肚，寧願Bring Your Own Meal。空姐朋友L話，除咗廉航，一般航空公司都唔會阻止你帶食物上機，三文治、沙律、穀物能量條等都係好選擇，沙律菜可選擇挺身的羅馬生菜，比易變腍嘅火箭菜更好，已切生果亦較方便易吃。最緊要食得有品，避免強烈氣味或者多醬汁食物，尤其是芝士、泡菜及咖喱等，臭親人就唔好啦！
最近倫敦老牌百貨Fortnum & Mason新出的飛機餐，以經典Hampers作概念，可以揀鵝肝、魚子醬、燒牛肉沙律、煙三文魚等商務級食材，放入一個勁靚的Tiffany Blue保冷袋，每份由15至50英鎊，貴，但吸引！空姐朋友溫馨提示，帶上機食物要食清光，因為部分國家如澳洲對入口食物非常嚴格，食淨條蕉都唔畀你帶入境。計阿珍話，最好都係食飽先上機，唔使煩！
