機上產子 一世免費飛？咪亂嚟！＠杜遊珍
廣告
為咗美籍，可以去到幾盡？早前一名台灣孕婦，為咗孩子一張綠卡，瞞天過海闖關上機，結果在機上作動，搏老命之餘，更強迫所有機組人員同乘客一齊陪佢生，搞到急降阿拉斯加兼delay四粒鐘，其實全機人都好偉大囉！最後女嬰成功入籍美國，婦人則被遣返回台，見唔到親生女，值得嗎？
雖然曾有唔少傳聞空中出生的嬰兒有「一世免費機票」甚至獎學金，但聽空姐朋友L話，一般航空公司唔會高調送禮，因為唔想鼓勵大肚婆衝上機等生 仔，你估飛機係產房咩？但咁啱台灣媒體最近又番炒33年前一單真人真事，一名女嬰在華航國內線出世，獲總經理承諾送出一生免費機票，事主後尾遺失證明又改埋名，最近33歲的「女嬰」現身要求華航找數，華航聲稱確認身份才兌現承諾。
空姐L補充，點可能送一世機票咁著數吖，架機緊急降落已經要使一大筆，開返張單畀你就差唔多！而且機艙好唔衛生又有氣壓，對孕婦及初生嬰兒都危險，唔係次次都咁好彩有醫生在場。奉勸一句，唔好亂來！
