最雞男主角—機場續篇@杜遊珍

天王之座─揀錯嚟坐！

面對巨星，唔係個個地勤都把持得住，有次同事就因為只顧睇明星，而犯下彌天大錯─姊妹M話嗰次見到同事雀躍宣揚自己剛剛幫「天王椅」辦Check in，拎住登機證回味之際，突然被召問話，返出來喊到妝都溶埋，原來「天王椅」要去上海，同事居然入錯咗北京班機，天王本人懵然不知，搞到喺boarding閘口撞見「至矮哥」，傾開先發現自己根本唔係搭呢班機！M話呢件事真係好離譜，就算同事喊到隻眼腫過乒乓波，都難逃收 Warning Letter 嘅命運！

巧威威─電眼VS揼心口

早年憑住唱上、下集情歌紅過吓嘅「酸威」，有一段時間經常返大陸拍劇，有次姊妹K幫佢Check in，「酸威」一嚟就不斷撩傾偈，明明行李爆磅，仲45度微笑兼單眼，問可唔可以免收超重費！兩大車行李喎，仲單眼！你估依家仲有人每晚想你十次八次咩不過講到cheap，都未及另一位來自二奶台、自詡紅遍潮州嘅威哥， 呢位上世紀的「亞洲一哥」喺機場流傳一個經典笑話，有次坐商務返大陸，Check in時要求地勤將鄰座Block起唔畀人坐，地勤見班機都幾滿就拒絕佢，點知佢除低副黑超同地勤講︰「幫幫手吖﹗我喎，係我呀﹗」搞到地勤一頭霧水，仲以為佢係政要㖭﹗

富豪公子─超凡禮遇

暗星Check in當然要有自知之明，不過姊妹L題一轉，大歎「有錢人就真係想點都得囉！」就記得佢剛入行時，曾經幫城中富豪的二公子Check in，不過全程由助手代勞，L話︰「唔好話個樣吖，連證件都無得睇，得一封連相都無張嘅政府委任狀咋﹗」L當時入世未深當然騰雞，佢Supervisor仲以港女口吻訓示，講到能夠幫頂級富豪Check in嘅經驗要鑲起珍藏咁滯︰「人哋出入都有私人飛機，如果唔係陰差陽錯公職在身，邊使同人迫頭等　」咁又真，有錢係大晒嘛，OK you win﹗

延伸閱讀：台灣大旱要制水 邊個最高興？！@杜遊珍