暖笠笠滋潤美顏懶人包@Dining娜

今個聖誕同班好姊妹喺屋企搞Xmas party！不過次次開party都飲酒或者汽水，對於我呢啲國際級吃貨嚟講，間唔時都要唞唞，想盡興得嚟又健康！所以今次特別準備咗鴻福堂嘅滋潤美顏湯水同飲品做party主打，介紹俾大家嚟個冬天滋補派對！

冬天最啱飲滋補湯水

好多女人一到冬天就會手凍腳凍，計我話…四時養生真係好重要！鴻福堂嘅湯包有唔同功效，啱晒要求多多嘅你。

想滋養補身嘅就有金華火腿冬菇燉魚唇湯，其實魚唇本身有豐富膠質，好啱啲脾胃虛、皮膚容易乾同痕嘅人。啖啖魚唇同冬菇，鮮甜得嚟又易入口；而椰子花膠雪耳竹絲雞湯就啱晒吸收力比較弱，同埋頭髮、皮膚都乾嘅人，因為竹絲雞益氣養血，加埋花膠、雪耳、玉竹呢，就更加潤肺益胃同滋潤養顏，冬天都唔怕乾呀。湯入面仲有椰子附料，咬落有陣陣香味添～

另外無咩胃口、氣血唔足就可以飲黑松露花膠象拔蚌響螺湯；面色暗啞、瞓得唔好就啱飲蟲草花淮杞花膠雞湯！款款都咁滋補，加熱就飲得，慳水慳力，質素拍得住阿媽啲靚湯呀！

方便好味嘅滋補飲品

講到方便呢就一定係滋補飲品，一扭開樽蓋就飲得，得閒飲兩啖桑椹桂花紅棗茶，入口酸酸甜甜咁，補血又開胃！但講到我最鍾意都係花膠冰糖雪耳甘露同燕窩蓮子百合蛋白奶露，傳統花膠同燕窩糖水都可以拎起隨時飲，而且有晒材料喺入面。想加熱嚟飲又得，搖兩搖再飲更加爽呀！總之，隨你口味，隨你歡喜！

大堆女士恩物甜品

如果要揀女士必飲呢，我一定揀四物紅棗雞蛋糖水，好多人都唔知四物係咩，今次我索性搵埋四物出嚟俾大家睇！分別有熟地、當歸、白芍同川芎，唔好睇見藥材就怕，其實個味一啲都唔苦，好多生完bb或者手腳冰凍嘅人都會飲，幫助補血調經、行氣活血！

以後開party記得考慮下我嘅建議喇，邊開心邊補身呀！