旅行遇上藍絲帶@杜遊珍
廣告
旅行社朋友最近都好忙，皆因佔領運動散席之後，無論邊個陣營都好想盡快行開散吓心，日、韓、台、泰甚至俄羅斯嘅查詢都多咗一截。不過領隊F就同阿珍講，千祈唔好以為出境散心就可以避開爭拗，帶隊出差嘅佢就話要小心翼翼：
Case 1 團友表態 全車大執位
阿F解釋，佔領告一段落，好多藍絲特警都搶住攞假遊埠，衝突一起，執生王都死！最驚心一次係某個韓國團，出發首晚唔知邊位講起《逆權大狀》，竟然觸發全車團友自揭底牌，當中既有瞓街抗爭者、又有扑頭黨、仲有自稱綠絲嘅鄉紳（咁都得？），各持己見城市論壇，打後空翻扯開話題都唔掂，之後幾餐飯都要重新排位，「好彩公司Book架旅遊巴夠大，可以分前後座，否則迫少少都可能打大交」！
Case 2 民意逆轉 事後孔明
其實阿F自己本身都有一定嘅立場，佔領初期頻頻落區，後來聽到黃絲空姐被禁入境、無名學生連澳門都唔准入，考慮到工作關係「都係堅持唔到落去」，近月頻頻帶隊嘅佢就目擊團友由初期齊口聲討催淚彈，漸漸變成七嘴八舌、人人化身事後孔明策略專家，就算成日飛嘅佢，都好難覺得散到心。
Case 3 自我審查「毋忘雨具」
正所謂「跟團出埠、乜人都有」，阿F表示近排佢就算帶短線團都會好謹慎，以前每逢落車都會提醒團友「有遮拎遮、有雨褸拎雨褸」；依家溫馨提示就自我審查成為「攞齊雨具」，佢強調唔係公司要求，只係唔知團入面有冇神經脆弱嘅團友，聽到遮就會「起貢」，怕嘈交咁話！
