旅行的運氣 還看你「心地」＠Lucina Lo
旅行很多時講運氣亦講你的「磁場」，我更相信是講你的「心地」，特別是觀賞時令景致, 如春天賞花秋天看紅葉冬天賞雪去阿拉斯加睇北極熊非州睇動物大遷徏……
年前到肯亞safari觀野獸，便證明了一些心地差的人，拖累了自已的運氣 ; 當時跟一班財大氣粗之所謂「有錢人」同行，當時正值依波拉病毒於西非肆虐之時，「有錢人」好像覺得所有黑人都好似有依波拉病毒般，入境時跟黑人一起排隊已大發雷霆怨氣很重，更質問隨行香港旅行社職員為何他們見到有啲人攝啲錢入passport便可以不用排隊順利過關，呢啲洗黑錢的行為，唔係以為文明的香港旅行社職員會這樣做吧!
在肯亞睇動物，必須保持安靜，政府規定safari車輛必須跟動物保持一段距離，但同行一個有錢人見到獅子時竟然好似在長隆動物園般，發出叫聲引牠們注意，此自私無恥之舉動立即被生態導遊喝斥大罵，作為同行的香港人，我也覺得被他影衰。
當時這批「有錢人」心目中以為去非洲睇動物，便等於睇動物大遷徒，行程預計了一天前往最著名的Mara River等待成千上萬角馬過河的震撼場面，出發前已收到消息，當時大批角馬已過了河，其實震撼場面的機會較低，我們當天由山長水遠的酒店出發，開幾個小時車到河邊，只見對岸角馬只得幾百隻，怨氣很重的有錢人，不斷喃喃自語埋怨又話呢個季節一定睇到角馬過河， 其實大自然那有甚麼保證，你都未必可以保證你啲仔女聽教聽話 ，更何況係天空海闊任鳥飛的洪水猛獸，如此無知，還是回港小小天地跳飛機吧!
不過有錢人仍抱有很大寄望，等了一個多小時，身驕肉貴的有錢人開始肚餓，但當地政府規定河邊不准進食，一定要去到老遠地方開餐，大家唯有先去開餐，開餐約大半個小時完事之際，其中一名團友一個華麗轉身回望Mara River，啲角馬竟然已過哂河，我實在懷疑他們的怨氣太重，連角馬也趁牠們食lunch先過河。
有錢人心有不甘，之後一天明明下午要上機，也要於早上晨早出發再睇碰一次運氣，其中一個經常對隨行香港旅行社職員呼呼喝喝又要他幫佢搬行李(其實旅行社職員是不包幫客人搬行李的) 更用行李車撞香港旅行社職員的肥佬有錢人，因為今次旅程專登買了一支十幾萬的長鏡 (即係啲體育記者响龍門後影相這種大炮)，所以也明白，他如果一次角馬過河的大遷徏場面都拍不到，回港實在很難跟朋友交代亦唔夠料向朋友炫燿。於是，大家分幾部車出發，這名肥佬有錢人，到中午時份捱不住肚餓，他令司機先回酒店，怎料他離開幾分鐘，我們的車子便見到角馬過河 (雖然我並非好恨睇到這場景，但都Ok既總叫睇過吓，因為我覺得靜靜欣賞草原其他動物的動態，反而更有趣)。
其實，要欣賞大自然景象，實在需要耐性和一顆平靜的心，如果像這班有錢人般每天因旅程小小阻濟便發洩於工作人員身上，心地如此唔好又咁神憎鬼厭，連動物都會怕咗你，藍天不會出現、動物躲起來、運氣也會消失，大自然的美麗，無論你用幾多錢都買不到的。
還有，即使係動物大遷徏的季節，也絶對不能保證可以睇到角馬過河的景象，即使旅行社職員告訴你，「我未聽過有客人在動物大遷徏的季節睇唔到角馬過河」，他絶對是騙你的，因為我見過，我真係見過，這班心地唔好的有錢人，於八月的肯亞動物大遷徏季節，竟然睇唔到角馬過河!
最後，我認為保持一顆善良的心和平常心，上天總會眷顧你的。
Good Luck!
