承諾 其實只會令人失望＠小盛女

「係咪真㗎？你次次都咁講，最後咪又係話要OT。」女友Brenda晦氣地說。
「今次真，一定走到！」Mike肯定地說。
「Yeah！我哋終於有得見面！其實就算你要OT我都可以搭車過嚟等你。」Brenda說。
「唔使，我一定會準時六點走！信我！」Mike說。
臨近聖誕是很多公司的peak season，Mike的公司也不例外，日日打仗咁款，所以已經數星期沒有與Brenda見面，有時下班已經是凌晨時分，累得要命，所以也很少講電話和whatsapp，相反，Brenda卻非常空閒，每天都準時下班。今天難得可以拍拖，Brenda由中午開始已經滿心期待，更在午飯時到地鐵站買了Mike最愛的Goxxxx朱古力，下午就乘老闆不在偷偷開Openrice，看看銅鑼灣有甚麼又平又好吃的餐廳，雖然她知道Mike一定忙得沒有時間看whatsapp，但她仍然給他傳了一句：「掛住你，今晚見=D」

「我仲未走得呀。」Mike說，那時已經是七點多。
「仲有幾耐？我搭車過嚟等你吖。」Brenda說。
「唔好喇。」Mike說。
「點解你十次有九次都係咁？應承咗嘅嘢又做唔到，其實我已經對你講嘅嘢無晒信心，你永遠都係得把口講，你幾時有真正做到過？其實要OT咪講囉，點解次次都要畀假希望我啫！」Brenda連珠爆發，簡直生氣得想哭。
Mike當然不明白為何一件如此小的事會令Brenda這麼生氣，他只是覺得很無奈，自己已經在公司做到隻狗咁，連休息的時間都不夠，女友卻完全不體諒，還在亂發脾氣，他本想說：「你估我唔想陪你食飯㗎？咁多嘢做我都無計㗎！你唔好咁無理取鬧啦！」可是最後他還是忍住沒有說出口，只是說還要繼續工作便掛線了。

而Brenda又為何會氣得七竅生煙？這是因為女人總會把對男人的不滿堆積起來，然後一次過爆發，例如他之前明明應承過去迪迪尼最後又無去到，應承過不會再遲到最後又次次都遲半個小時，應承三年後結婚，最後三年之後又三年，單獨一件事的話女人可能會深呼吸吞咗佢算，但長久以來積積埋埋分分鐘會有原子彈般的威力，是以有時男人被炸死咗都完全唔知發生緊咩事。其實如果當中沒有任何實質或時間性的承諾，事情可能還沒有那麼壞，問題是當你口響響地應承女人後，她便會有所期待和不停FF，最後做不到當然會失望。

男人可能以為女人都好簡單，花言巧語幾句就可以氹得女人好開心，於是開口埋口都係嗰啲咩我永遠都會照顧你，我愛你一生一世，簡直bull shxt，你知道永遠是甚麼意思嗎？你知道甚麼是一生一世嗎？男人隨口嗡當秘笈，女人又信到十足十，陶醉於童話世界之中，以為公主和王子真的會永遠過著幸福快樂的日子，而現實中又有幾多個呢頭講完綿綿情話無耐就去搵個小三happy？又有幾多個講到龍飛鳳舞之後無耐又嗌分手？
可能你會話女人鍾意聽，男人咪講囉，係啲女人認真便輸了咋嘛，隨口嗡就當真。係，我承認我很看重承諾這回事，我認為說到就要做到，做不到便不要說，做得到亦不用說。所以我從不說「永遠」兩個字，因為我實在很討厭別人亂開空頭支票，而偏偏很多人都是大隻講，既然改變不了別人，惟有調節自己去適應，例如朋友例牌遲到，我便暗地裡預他遲半小時，如果他真的準時到就當bonus，遲了半小時也是預料之內，遲過半小時下次咪再adjust囉，總之無期望便無失望，更安全的做法是永遠不要作出承諾，亦永遠不要相信承諾。