情侶拍拖不思議現象@小盛女

「下，新年你唔使拜年咩？就算你唔使，你女友嗰邊都要啩？」我驚訝地說。
「我哋不嬲都各有各拜，唔使陪，你邊日得呀？」阿輝說。
「我幾日都要同阿Mike去拜年呀，一係我拜完年帶埋佢嚟一齊玩啦。」我說。
「睇嚟你哋仲係蜜月期喎哈哈！其他人呢？」阿輝說。
「我梗係都要帶埋女友嚟啦，放假掉低佢佢會殺咗我。」Ricky說。

阿輝大時大節，如聖誕節、情人節及元誕等一樣都會約朋友出去玩，完全不用陪另一半，也從來沒有帶過女友出來和我們一起玩，不說的話真的以為他還是單身。可能他和女友對大家都非常信任，有老夫老妻的感覺，每天都是情人節，不用拘泥於特定日子吧？雖則我和男友阿Mike也不會特別慶祝，不會在情人節買花，不會在聖誕節吃大餐，因為不想被人「劏」，但始終會希望當天可以一起過。

「喂，點解你同阿Mike好似成日都鬧交嘅？」阿輝說。
「情侶鬧交好正常啫，通常好快就無事，唔好話畀我知你哋咁耐都無鬧過交呀！」我說。
「從來無鬧過，因為我同女友係乜都無所謂。」阿輝說。
「無可能，相處咁耐無理由少少不滿都無，定係佢怕咗你唔敢講咋！」我說。
「超，你估個個都好似你咁港女咩！」阿輝說。

每次聽到其他情侶說「從來無鬧過交」我都會覺得很驚訝，每個人的價值觀都不同，即使雙方都是「順得」人，相處這麽久，遇過這麼多事，總會有意見不同的時候，特別是討論政治議題時，分分鐘會討論到面紅耳赤，即使避開敏感話題不談，總會有對對方不滿的時候，例如約會經常遲大到、與異性朋友單獨去街等等，但有些情侶就是可以從來不吵架，三百六十五天都非常恩愛，完全是amazing。

有些情侶拍拖更不會拖手或繞手，看上去真的以為他們只是比較熟的朋友，可能你會說夏天熱辣辣拖甚麼手，或男友/女友很多手汗不想拖，又或是在朋友面前不想太親密怕尷尬，雖然外國有很多情侶也不常拖手，但我總覺得這樣好像有點神奇。

其實每對情侶拍拖方式也不一樣，只要二人快樂便可，你們又遇過甚麼不思議情侶？