幼稚園4,000萬包 郵輪 豪派過萬粒湯圓 ＠杜遊珍
廣告
阿珍仲係名校學生妹時，中學每年都大搞旅行團，講緊嘅唔係北潭涌渡假營，而係遠赴冰島睇地質，去維也納教堂唱聖詩交流等，閒閒地一星期的旅程都收成萬幾蚊一位。只係阿珍點都無諗到，呢個輸在起跑線嘅情況，已經提早至幼稚園！話說阿珍收到風，上年聖誕就有間名牌幼稚園，豪包咗隻國際 郵輪 到台北，5日行程一共盛惠4,000萬！校長毫無畏縮，一口氣畀晒錢之餘，仲覺得師生、家長、舊生「坐埋一條船」好有意思！（雖然無講明要強迫你去，但你無報名，同學仔都會暗暗猜度你家境，都幾有壓力！）
阿珍本來以為賣唔出，點知最終船上4千幾個位瞬間Full House，仲要最貴的複式套房同環迴海景房最快爆滿，全船只得一間嘅複式房每位$48,699起，如果一家3口出發，就起碼14萬6埋單，去台北咋喎，認真富貴！郵輪朋友B 仲話，適逢旅程有日踏正做冬，就特意炮製咗過萬粒湯圓請小朋友食，鬼咩，收咗4,000萬喎，湯圓好閒啫！
