帶阿媽去旅行── 跟團/自由行？@杜遊珍

Apr 19 2015

雖然距離母親節仲有成個月，不過因為有線電視最近狂推《帶阿媽去旅行》，令到珍媽日夜暗示阿珍唔夠念親恩……本來諗住扯開話題，向珍媽推介舊年睇過一本遊記，講述卅歲韓國囝囝帶60歲阿珠媽背包環遊世界10個月，勞碌大半世的珍媽當然唔會頂得順越級挑戰，大歎「睇到都覺得辛苦」、然後勒令阿珍認真Plan Trip。

對於放假習慣自由行的阿珍來講，要應付母女外遊呢個「高危嗌交項目」，第一個諗法就係偷懶，打算帶阿媽跟團、最好一齊上郵輪，食得好住得豪，真係免卻唔少煩惱！好明顯旅行社都係咁諗，所以就算無公眾假期，都會力谷類似主題旅行團；殊不知珍媽都已經突破盲點，識穿團費收得貴，明明唔使佢畀都話要慳，仲懶叻話「電視台都無得揀、去旅行梗係自由行先好玩」！問過旅行社朋友，佢就話銀髮族自由行都有攀升趨勢，短線首選日韓台、甚至泰國旅行團都已經滿足唔到見慣世面的爸媽，父母輩掌握資訊速度絕對超乎想像，一家人各自拎隻Wi-Fi 蛋就打算城市闖蕩。

雖然爸媽心態想Go Wild，但係實踐起又係另一回事，阿珍同姊妹分享過，同老豆老母去旅行，設計行程最緊要係有咁老土得咁老土──帶佢去皇宮自拍、騎下大笨象，上唔使點郁Cooking Class，明明跟團已經去十萬九次，但Trust me，佢係鍾意的……（仲有好多阿媽自由行注意事項，下期繼續分享！）