帶著樂器去旅行 大提琴都可上機! ＠杜遊珍
廣告
前排港鐵禁止學生攜帶大提琴上車事件引起滿城風波，阿珍梗係睇唔過眼啦，明明年少時嘅阿珍都係搭地鐵返學，不時要搬座大提琴返學校練習，隔籬位同學仲係學豎琴嘅㖭，一樣坐地鐵，點解以前得依家唔得？我都知道呢個係關乎乘客安全問題，咁你有冇alternatives畀人先？好似搭飛機咁，都可以帶大提琴上機，不過要畀錢買多張機票之嘛！
咁啱上星期，阿珍在fb見到公關朋友share一排大提琴正準備登機的相片，查問之下公關H話其實航空公司經常要處理樂團的巨型行李，好多樂手都想自攜上機，但每間航空公司有唔同尺寸、重量規矩，通常小提琴都可以放上行李架，再巨型嘅就要寄艙，經常出外表演嘅樂團都有專用防撞箱以便寄艙，如果有啲珍貴嘅樂器不適合在低溫、乾燥環境寄艙，亦可以買張機票畀件樂器，由工程人員五花大綁，確保唔會影響其他乘客及機艙服務。公關 H 話今次turnover只得一小時左右，要安放好8個大提琴實在係分秒必爭！計我話呢啲先叫服務、心繫每一程囉，聲稱檢討中的港鐵，又會否參考一下？
