女人錢真係好易賺@小盛女
廣告
話說有日無嘢好做個人又攰攰哋，我就搵咗男友同我一齊去蒸腳，我哋都係第一次去，純粹好奇諗住試下。聽講間嘢好出名，去到已經滿座，有男有女，接待員就畀咗套衫褲同拖鞋我哋換，換完衫就揀藥包，有好多唔同功能，減肥呀排毒呀美顏呀消除疲勞呀，總之要乜有乜。坐低等咗一陣就有位，坐上大班椅再放對腳入木桶，踩住張墊咗毛巾嘅櫈仔，好快就覺得好熱，成個過程要不斷用手撥走啲水珠散熱。
「嘩，呢度話蒸半個鐘腳好似跑咗一個鐘步咁呀！」我說。
「點同呢，跑步可以練埋心肺功能，操肌肉，我就寧願跑步。」男友Mike冷靜地說。
「呢度又話蒸完如果條毛巾有白色點就係毒素，代表淋巴塞咗，木桶有水就係濕氣重。」我說。
「蒸半粒鐘個桶實有水㗎啦。」Mike說。
「買package嘅話可以任揀藥包，最貴嗰啲都揀得，而家仲要買20送20好抵呀！」我說。
「你覺得放個藥包喺腳底半粒鐘真係吸收到？我就唔信喇。如果係無效，幾平都無用啦。」Mike說。
蒸完成身都會出晒汗，我哋都覺得幾舒服，不過經過阿Mike頭先嘅理性分析之後，我已經完全無想買嘅意慾。服務員例牌即刻嚟sell我哋，話連續做幾日先有效，又講埋晒啲咩「哎呀你錫女友就買畀佢啦」嘅罐頭文字，好可惜我哋不嬲都唔受呢套，雖然我唔算係好成熟嗰類女人，但至少唔會蠢到覺得我男友唔買package畀我就等於唔愛我，好明顯呢啲只係銷售伎倆，想令我同男友陷入一個尷尬嘅局面。
平時我自己一個去美容院做facial或者按摩嘅時候，久唔久都會畀人sell到，明明話點都唔會再買，但係成日都好似畀人落咗迷藥咁傻下傻下又買咗，仲要唔平，一次比一次貴，「做咗皮膚靚好多㗎」、「做完肩頸痛即刻無晒」、「做幾次就見返條腰㗎喇」，往往都係走出咗美容院先識後悔。
「慘喇我今日又畀人sell咗我買package，不過今次部機好勁，可以瘦肚，可以修小腿，又可以令個胸挺啲，好多功能㗎！」我興奮地說。
「癡線，同一部機點會識得分，一陣碌緊個胸以為係瘦緊肚，碌走埋個胸。」Mike說。
「下，唔會啩，部機係修線條㗎嘛。」我說。
「女人錢真係易賺，不如以後你帶埋我一齊去做facial或者按摩啦，等我篤爆晒佢哋啲詭計！」Mike說。
唉，其實一句講晒，女人錢真係好易賺。
