女人真是一種很難服侍的生物 ＠ 小盛女
「送畀你㗎！」我說，並充滿自信地在巴士上拿出禮物。
「下？D字頭熊背包？你喺邊度買㗎？點解個樣好似怪怪哋嘅？」Brenda說，只見她面有難色。
「喺潮特買㗎，你唔鍾意咩？」我說。
「唔係，我都鍾意，不過如果份禮物符合以下呢三個條件會好啲，第一：唔好用信和裝四仔嘅黑色膠袋裝住；第二：唔好買翻版；第三：唔好太大件，屋企唔多地方放嘛。」Brenda說。
「哦，我知喇。」我說，並心想這次真是寶寶委屈，但寶寶不說。
老老實實我每天加班已經很辛苦，下班都想回家休息，但為了令女友開心，我都東奔西跑去找那個甚麼D字頭熊的東西，而且我哪懂分辨正版翻版呀？再者，禮物不要太大件，如果我送你一間屋你還會嫌大嗎？沒有領情不單止，還要給我送禮三戒，真是有點灰，不過我向來屢敗屢戰，一周年紀念日快到了，經過上次痛苦的經驗，我今次精挑細選了一份更特別兼應該不會再出事的禮物，而且已經預先放進一個很美觀的紙袋裡，心想今次仲唔掂過碌蔗！
「送畀你㗎！」我說，並再次充滿自信地在巴士上拿出禮物。
「情侶T-shirt！？上面仲要寫住Will you marry me同Yes I do，你唔係想……？」Brenda驚嚇地說。
「放心，我唔係想求婚，只係見個公仔幾得意，咪諗住送畀你一齊著囉，你唔鍾意咩？」我說。
「唔係，我都鍾意，不過件衫係大碼我唔係好啱著，同埋印咗呢句字，我平時著出街會有啲尷尬。」Brenda強顏歡笑地說。
「哦，唔緊要，咁你當睡衣著囉。」我說。
自此以後，我便再沒有親自選過禮物給女友，每年生日、周年紀念日她都會自己去選禮物，我只需負責找數便可，雖然久不久她也會抱怨說為甚麼我不像其他男人般會給女友驚喜，那麼浪漫，不過每當我一提起D字頭熊背包及情侶T-shirt她便會自動投降認輸，然後我便不用再苦惱大時大節要買甚麼禮物給她，可謂皆大歡喜。
