回顧我們的2014年飲食大事@Charmaine
「你厚多士」： 地鐵阿嬏的一句，全城熱烘烘，話你「好多事」變成「厚多士」，帶挈厚多士亦Hit爆，無獨有偶，主打厚多士甜品的台灣過江龍Dazzling Café年中在尖沙咀開業，一度成為人龍店。
759天下： 759阿信屋氣勢有增無減，分店總有一家在左近，今年更積極擴展版圖，開設雲吞麵店、茶記、車仔麵、Café，聞說明年年頭還有Bakery！
KFood不死： 大家對Kfood的熱情從未冷卻過，有供就有求，今年新開的韓國食店，BBQ、炸雞店、蜂蜜雪糕、J筒乜乜乜，數目超多，部分更是首爾過江龍。
英廚登陸： 真係巧合，英國人氣名廚Jamie Oliver、Gordon Ramsay同樣在今年來港開餐廳，連我等飲食記者都超級期待。論誠意度Gordon滿分，開店時親身來港跟大家見面，Jamie呢？餐廳開了半年，影都無，失望囉！
撐小店： 佔領運動暫時告一段落，但那79天人性盡顯，有食肆老闆潑婦罵街鬧學生，亦有良心食肆免費派物資去撐場，仲自發撐小店行動，人間溫暖啊！
三星廚撻著： 十二月初有雜誌拍到孫佳君在新晉米芝蓮餐廳Season，與法國大廚Olivier當眾French Kiss，仲上埋封面。其實這位Olivier師承Pierre Gagnaire、Joel Robuchon，不少行家都試過他手藝，口碑不錯，計我話廚師都係人，食物出品夠好咪得囉！
吸金公仔Café： Kumamon、Melody、Little Twin Stars、Plastic Thing、姆明……年內不少餐廳看準少女食客心態，跟卡通公仔Crossover，除了食物都有公仔嘜頭，部分更設專櫃賣埋精品吸金。
巨星殞落： 這個年代有深厚知識又有氣度的「食家」愈來愈少，一代食家江太史的孫女江獻珠女士及鏞記掌腦甘健成先生，均在飲食界德高望重。今年他們撤手人寰，不忘老行尊對食物尊重及認真的態度，值得我們學習。
