冇品奧斯卡 飛機 癲佬逐個捉！＠杜遊珍
廣告
上月尾，有位極品港女網上大鬧某某日本廉航，百萬身家未開頭嘅囂屎態度自然被網民強烈恥笑；奇葩的行為提醒咁多位，坐 飛機 發神經並唔係強國專利。嗱，阿珍咁多年飛來飛去，都有緣見過唔少航機上的黐線佬；坦白講，騎呢冇品乘客，乜嘢顏色都有、總有幾個喺附近，最近又有外國網站搞咗個「年度shameless旅遊人」競選，提名階段反應已好鬼踴躍，以下一齊溫故知新，檢閱一眾出類拔萃嘅候選單位：
最佳美腿入圍名單：（1,676 people like this）
我明白沙甸魚座位的確屈質， 飛機 上有長腳蟹周圍伸腳唔係新奇事；但有冇需要掛到咁高一高、仲要開射燈照到正呢？唔怪得有口痕友留言問「open for business?」 好鬼啜核！
健美先生入圍名單：（1,440 people like this）
冇自信會死人，但太有自信就會累死人；唔明點解咁多阿叔鍾意打大赤肋坐 飛機 ！望住佢呢身欷歔嘅體毛，就算右邊位哥仔只得一隻眼上鏡，隔住個mon我都睇到佢嗰份絕望。RIP。
千里共嬋娟入圍名單：（870 people like this）
中秋節就過晒，但願意將自己個月光光公諸同好嘅則大有人在；omg，咩年代啊仲著瀨屎褲？試諗下瞓喺呢位阿哥隔籬，一擘大眼就可以直擊「超級月亮」，係咪好鬼震撼？
金盆洗手團體大獎：（2,870 people like this）
呢個票都唔使投，一出張相已經贏咗喇，我話嘅！先唔考慮個廁所發生乜嘢事，單睇圖中嘅劑量，就知有賴機上乘客通力合作先水到渠成，X，幾咁有默契！
