公司旅行大棚人 最好約埋做船民@杜遊珍
廣告
阿珍份人，比較特立獨行，讀書時代已經好驚參加班會大旅行（ 偏偏試過幾份工都係湊客帶隊，你話係咪自作孽?!），若然公司叫我參加旅行、砌字、講座、拉Banner 呢類活動，肯定扮病射波搵定匿，千祈唔好影到我！
個別行業 樂在其中
一樣米養百樣人，對於上周熱傳大陸某集團6,400員工集體遊法國嘅新聞，阿珍簡直不能理解，身穿制服幫老闆賣廣告，何解可以表現如此興奮，好在有朋友公關P幫我解答。其實「員工獎勵旅行團」並唔罕見，尤其傳銷、保險呢類好講求團隊士氣嘅公司，就特別需要定期舉辦旅遊團，「你話洗腦又好、Team Building 又好，總之佢哋特別鍾情透過外遊維繫公司向心力，舉旗、吶喊、嗌口號根本係家常便飯！」公關P仲大讚嗰位老闆十分聰明，招搖至此，不但職員歸屬感倍增，計落仲好過畀錢落廣告，一舉N得！
「包團不如包船」
不過曾經代辦唔少公司團嘅P亦承認，出動六千至一萬個職工外遊，的確非常震撼，若無國家級機構協助，呢啲Job 佢都唔敢接！「成隊兵咁大棚人，仲要個個當自己係大爺，包車、包機、包酒店，淨係對人名都做死人！」為咗省力省時間，阿P近年都傾向說服呢類公司改玩「包郵輪」── 行程唔使安排、活動保證豐富，食飯正餐或者buffet 都係免費，「最正係郵輪不乏Theatre 或者演講廳， 啱晒啲主管搞講座或者頒獎禮， 想睇6小時
PowerPoint 都無難度！」一千幾百人上船，7至8位數字已經可以埋單！難怪唔少郵輪公司都進駐亞洲、上海天津出發日韓遊，每季都接唔少呢類大茶飯啊！
