【全民運動日2018】全港多項康體活動及康樂設施免費開放＠ MISS SUNNY
廣告
唔好睇我 Miss Sunny 咁 fit 就以為食極唔肥，其實我每日都最少做三十分鐘運動先Keep到㗎！有時落街跑吓步，有時喺屋企做吓健身操，總之唔做運動嗰日就好似差啲嘢啦！仲未養成呢個習慣，又唔知做咩運動適合自己？不如趁 8月 5日「 全民運動日2018 」，體驗吓做運動有幾好玩先！
（Presented by 康樂及文化事務署）
全民運動日2018 免費參加康體活動一覽
一時三刻未知自己對邊樣運動有興趣，就趁「 全民運動日2018 」，免費參加多個同樂活動體驗吓先啦！我 Miss Sunny就提議未接觸過嘅朋友可以先參加入門級嘅舞蹈同樂、身心伸展訓練同樂、器械健體同樂同埋毛巾健體操等，大人小朋友都可以參加㗎！如果想了解多啲健康資訊，亦可以參加健康講座及運動示範、姿勢評估及矯正諮詢同體適能測試及諮詢等。7月16日(星期一)上午8時30分就開始報名，先到先得，有興趣記得Mark實時間，到主辦活動嘅康文署分區康樂事務辦事處或指定場地報名啦！
快啲揀吓想參加邊項活動：http://www.lcsd.gov.hk/tc/sfad/2018/programme.html。
康樂設施免費開放
如果好似我 Miss Sunny咁，一早有心儀嘅運動，「全民運動日」亦開放多項收費康樂設施畀大家免費使用！無論室內定戶外設施都有，每人只限預訂一節免費設施（不限設施類別），先到先得㗎！記得 7月 29日（星期日）上午9點起喺康文署各區場地嘅「康體通」櫃枱訂場處（不包括自助服務站）預訂呀！預訂時要出示身份證明文件同埋認可資格證明（如有需要）㗎！
