全城嚇鬼熱 環球鬼屋逐個評@杜遊珍

荷里活班底 化妝最讚講到咁有來頭，阿珍都忍唔住打畀住喺美國嘅表妹G起下底「Fright Dome 搞咗12年，勝在年年都有唔同主題，3年前佢哋用MichaelMyers（ 即係電影《Halloween 》裡面帶住白色面具嗰個殺人魔呢！）吸客，Las Vegas Strip 都掛滿宣傳板，令人真係以為Michael Myers is intown，Marketing 做得好好。不過你話係咪好驚，又唔算，始終有啲驚嚇位你預計到，但要讚係玩家可以玩迷宮咁獨闖場景，唔似喺香港只能依指定路線行，感覺好玩好多，而且演員的特技化妝真係好逼真，場景布置又用咗好多機關，都幾開眼界㗎！」不過因為人太多，建議大家都係買特快證好過！

東瀛妖物 氣氛最陰濕

老老實實，阿珍唔太嗜玩鬼屋，但記得當年陪個Ex 去富士急遊樂園時，真係畀嗰間猛鬼醫院嚇到心都寒埋！要知道日本人做嘢幾咁認真，喺入場前要聽一輪關於醫院的歷史（ 有中文字幕㗎！），等大家入戲後就拎住支電筒探險，醫院裡面的布置唔使講梗係好陰森啦，但可能《咒怨》 、《午夜凶鈴》等日本恐怖片實在太深入民心，就算員工唔見得特別落力嚇鬼你，阿珍不期然諗起伊藤潤二筆下的女鬼，如果當時唔係有壯男相伴，阿珍睇怕已經由逃生門（ 真係貼心為中途放棄的人而設㗎！）搵路走，之後同姊妹講開，先知道原來呢間猛鬼醫院咁多年都係keep住好口碑。

強國山寨版 全程得啖笑
至於強國的龍頭主題樂園，幾年前都開始學人搞西洋鬼節活動，Well，阿珍就搵咗採訪過的旅遊記者C同大家分享：「全程驚嚇不足，爆笑有餘，簡單講就係用荔園式Old School 嚇人方法，轉角位就伏擊你，驚嚇位其實都估到晒，園內大部分鬼是是但但笠個面具，頭身兩截色，動作非常唔smooth，淨係識不停低吟。」咁講法，對玩慣鬼屋的香港人來講，豈不是毫無吸引力？旅記C就以智者的口吻話：「其實返得大陸玩，鬼怪仲有乜好怕吖！」哦，明晒！