京阪行(七)－倆全其美＠呢啲嘢啊
Rikuro’s老爺爺芝士蛋糕
起身諗自己食咩好，結果諗起嘅係行經心齋橋多次見到的甜爺爺芝士蛋糕。對比香酥嘅半熟芝士撻，我心中更愛芝士清蛋糕，最鍾意欣賞佢個種彈彈下的質感。行到鋪面，顏色紅紅白白，搭配淡黃色，已經有種溫暖，加上甜爺爺的剪影，再望望一個個烙了甜爺爺啡蓋黃身的芝士蛋糕上。唔洗再諗再望，二話不說衝入去。
揀咗一個類近吧臺位的位置坐低，可以睇到哂師傅整蛋糕的過程。係食物未嚟嘅時間，呢種望住女師傅高速快打手嘅表演，迅速逐一將糕料倒入圓模陣中，加入適量嘅水於盤中，就拎入去焗。見模中的糕料於液態時已具有彈性似的。
轉眼間職員已送出一件蛋糕與一杯咖啡，一個套餐只係378yen，抵食。芝士蛋糕輕量清新，能嘗的芝士味不多但香氣十足，比香港的始祖伊騰家少一份濃多一份鬆。唯獨我不愛的是底部的提子乾。咖啡有日式做法的香濃，卻不苦澀，細滑而不味淡。1956年至今，又是間好老店。
轉個身再行心齋橋同美國村，再走遍了兩三轉，好確認自己沒有走漏眼。最高興是發現一所件件390yen的雜貨店，文件夾，掛勾，文具，十足Justco12蚊店。但鋪中最入的位置則別有洞天，是古著區。最後，再幫同事家人朋友掃掃藥妝。
神座拉麵
行唔夠一陣，肚仔又要醫。臨走先發覺自己嚟日本無食好多好多拉麵係唔得，所以揀咗另一間係道頓掘發跡嘅神座拉麵。1986年開業，至今全日本已有超過40間分店，大阪道頓掘與千日前店為首兩間鋪，在下去嘅係較為舒適的千日前店。（有機會下次一定會去拜訪本店！）
神座拉麵最出名豉油湯底嘅美味拉麵，老闆布施正人話呢款拉麵只要食過三次便會上癮，嚟到梗係試試，睇下會唔會食多兩次就上癮。我就特登叫無九條蔥版一試其真味，上檯時有別一般拉麵的惹味香，反有種清香，聞落似不帶味精個款。望上去見到大堆椰菜，湯頭清，可一望到底，飲落甜，似住家煲菜湯可狂飲而不厭。
叉燒不錯，因湯較清甜而不見油膩，但較碎身，食落唔夠爽。麵為圓身，加上神座拉麵個碗同埋菜多的伴，勁似中式麵身，較黃亦重少少蛋味。較畫龍點睛嘅就係半熟蛋一隻，清淡的味道中有點濃稠的感覺，重身少少又不佔太多戲份。
大阪拉麵食後感，無固定湯底配料模式，好似家家都唔同咁，咁先有唔同捧場客，有唔同特色，都唔知嚟幾多次先食得哂。神座亦設無限韮菜，但我認為神座的湯底較清甜，並不需咸辣所助。濃湯淡吃，各有愛好—喜歡淡淡的，神座勁啱你。
行多兩行就無時間，要向這七天的京阪旅講聲掰。拉住行李，向JR站進發，走過不少好風光，慢慢的(其實是重重的行李拖慢了吧…)在這城市最後漫步。
実演手打うどん杵屋
搭個快車，仲撞到遊夜船同座的兩位女乘客，出閘俾旅遊局嘅人邀請做問卷。最後到機場行咗陣，順手用最後嘅彈藥，食最後一餐。行哂咁多未入禁區前嘅餐廳，最終揀咗自己所喜愛的烏冬(烏龍麵)作結。杵屋為グルメ杵屋株式會社旗下餐廳，擁有37個餐廳品牌，仲有好多飲食業甚至物流業的分公司，你話架勢唔架勢。集團已於日本 有460多間鋪，杵屋佔當中百多間，主營自家製手打烏冬，開咁勁唔知質素得唔得呢？
一去到櫥窗已經見到我嘅心水！二話不說埋位即叫，佢有雞肉親子丼加冷烏凍套餐，兩樣都比正常細份，俾食客一次過食哂兩款，仲要係我最愛添。定食套餐一上就上成份，梗係食咗個熱食先啦。雞飯味道不過不失，只係雞肉無乜鮮味，反而蛋就非常香。
食完個飯就輪到杵屋最出名最引以為傲嘅烏冬啦，其實唔洗點好味我已經會無限加分，人總有喜好偏心，在吃的層面，我就係冷麵冷烏冬。將薑蔥倒落冷麵汁中，再徐徐將麵條放落去，望住汁的水平線因幾條麵而漲起，又見白麵因黑汁而染色。把麵雪雪聲送入口，唔夠2分鐘，個麵已清空。我差點連啲汁都想乾咗佢…講番個烏冬，煙韌爽口，好耐都未食過咁正的烏冬，唔係個親子丼頂一頂肚，同考慮埋就上機，我會叫多份嚟食。
食完行下又執兩堆零食手信，再慢慢去登機，轉眼就到了香港。
這一趟旅程若算開心，便是無負這一生—《落花流水》。散心之旅就此結束，打一打這篇七天遊也用了我大半年的時間，雖然很多時都是公事忙而忘或懶，但真的每次打起也會想起這初次一人旅行的感受，心時靜落，亦時沸起。
靜，是晚上淡淡走於日式街道的漫，是下雨潑身進去食店所送上的湯，是列車中搖晃卻不噪的禮。沸 ，是知道我急於去下一站。哪一天我會再飛？
終於完成了這個京阪行。
最後送上日日一罐番外篇
Rikuro’s老爺爺芝士蛋糕
大阪市中央区ナンバ3-2-15 012-057-2132
www.rikuro.co.jp
神座拉麵（千日前店）
大阪府大阪市中央区道頓堀1丁目7-3 06-6213-1238
www.kamukura.co.jp/menu.php
実演手打うどん杵屋（關西空港店）
関西国際空港旅客ターミナルビル3F
www.gourmet-kineya.co.jp/index.php
Ed
呢啲嘢啊? (edyeah.blogspot.hk)
延伸閱讀：
