不學無術Content Farm 呃Like、謠言、大災難@杜遊珍
廣告
响呢個資訊發達嘅大時代，網絡瘋傳嘅消息未必係真，要引證來源係堅料，絕對靠網民及媒體嘅常識。上星期就接連爆兩單旅遊假新聞，搞到阿珍忍唔住要同大家分享下，以正視聽！
謠言瘋傳 泰南大災難？
網傳一位泰國相士預測六、 七月份泰國南部會有大災難，搞到人人驚驚瘋傳。阿珍我梗係打畀泰國通Roger 問問，原來超多人煩佢！Roger 無奈表示，嗰位泰國相士確實有上電視，但都只不過係泰版《怪談》專講神怪嘢，而其實當地年年都有神棍出來講兩句，遇上政治事件，更會加鹽加醋，當地人都處之泰然，泰文傳媒亦未有大肆報道，反而近兩星期某殘體字網媒就煞有介事轉載，仲當真嘅一樣咁去配圖吹噓，欠缺分析力嘅網民就餓狗搶X咁去Like & Share。旅人仍好擔心？Roger 惟有補充，曼谷丶芭提雅其實並非於泰國南部，如果買咗泰北清邁機票都擔心嘅朋友不如先睇睇地圖！
港媒誤讀 澳洲簽證加價喎
嗱！咪以為資料由傳統媒體發布就無死！上周多份報章就誤傳澳洲旅遊局簽證手續更新、要親身去打指紋及額外收四百幾蚊，多間網媒亦瞬間照抄。咁啱行家J同期要去悉尼睇SHOW，見到忽然加價咪打去當局求證，原來係因為港媒無睇清楚官方資料的附加細項，新條例寫明持有香港或澳門特區護照及BNO 人士無影響，搞到當局都立即出新聞稿大大隻字澄清！
阿珍好明白，做媒體消息要夠快，網媒落後一秒更係罪！不過，快到盲目搶報流料、甚至明知係謠言都傳咗呃Like 先，就真不該！大家面對網絡消息，真係要提高警覺咪盲信！
