迪士尼樂園酒店套票騙局！逾百名港人被騙 涉及金額過百萬！｜網絡熱話

迪士尼樂園酒店套票騙局！騙徒偽冒員工精密佈局 涉及金額過百萬！

有網民於「迪士尼 海洋公園 門票餐券等買賣分享」群組上表示，有朋友透露早前透過一位自稱迪士尼高層嘅人以員工價購買酒店住宿連3餐套票，成功入住之後諗住開心share，話對方仲可以而優惠價購買年票同酒店套票，於是約埋另一班朋友諗住八月可以同小朋友一齊入園玩，誰料入錢之後對方諸多藉口表示未能申請辦理年票，樓主想安排退款時佢更潛水及失蹤， 係加入咗WhatsApp苦主群組之後先發現原來受影響人士達到200多人，初步估計被騙金額已超過100萬。

其實照計香港人咁醒目應該冇咁易俾人呃，但原來呢位化名Carmen嘅騙徒亦都明白呢個道理！她首輪向人兜售的時候聲稱自己是樂園員工，可以用優惠價購買套票轉售，等大家可以成功入場後，然後向身邊的朋友分享。但其實Carmen一開始應該係用自己錢以正價購買套票用折價轉售，蝕少少但當賣廣告，最恐怖的是入住酒店當日呢名「自稱員工」更會幫大家辦理入住手續，之後的人因見有朋友成功攞到年飛同入住，當然就會放心過數，更預留未來幾個月嘅門票或者酒店套票，才至會有如此巨額的騙案。

近百名網民湧入樂園FB留言洗版尋人！

一眾受害者求助無門，紛紛湧入樂園官方FB留言洗版，向樂園查詢是否有名職員叫Carmen Chen，並試圖尋求樂園的協助。

迪士尼樂園：已經報案！

迪士尼樂園得悉事件後亦有作出回應，表示從沒有推出或授權推出相關的折扣優惠及產品，同時亦表示已就此事件向警方報案，並會配合警方的調查。樂園亦強烈建議賓客應直接從樂園官方渠道或透過認可分銷商購買樂園產品，提防不可靠來源的賣家，免招不便及經濟損失。

其實網上交易大家應該加倍小心，特別係樂園門票，如果賣方聲稱只有QR code電子票，仲要唔肯面交，要你入咗數先至可以比飛，咁就幾平都唔好冒呢個險，面交實體票時仲可以即場上官網預約，以免張飛已經被使用！